Robynn葉晴晴 新手媽媽的追夢之旅

　　【晴報專訊】葉晴晴（Robynn）去年十月誕下女兒「小糯米」，小休大半年後，Robynn以全新短髮形象回歸樂壇，推出個人首支廣東歌《尚有一堆理由顯出我優秀》，道出媽媽也不能放棄追夢的態度。

 

 

　　Robynn去年大肚期間孕育出新歌《尚有一堆理由顯出我優秀》，冀鼓勵大家永不放棄、勇敢追夢。Robynn感激填詞人陳耀森，切實地寫出自己身為新手媽媽的心情︰「將我由做媽媽呢個山窿入面拉番出嚟，為自己做番啲事。」

 

除了作曲，Robynn亦擔任新歌的MV導演及剪接，親力親為。

 

　　不過Robynn透露歌曲的本意，並非為了生小朋友而寫︰「其實構思嘅時候，我已經有咗BB，但未感覺到做媽媽呢件事有幾顛覆我嘅生活，純粹覺得自己經歷咗好多人生轉捩點，例如離開舊唱片公司、由組合（Robynn＆Kendy）變做個人發展等等…估唔到最後份詞咁應景，更加切合做媽媽之後嘅自己。」

 

不建議囡囡入娛圈

 

 

　　Robynn的創作題材多數源於生活，去年推出兩首英文歌《Little Love》及《Fifth of May》，分別送給囡囡及已故母親。Robynn指自己的作曲靈感十分隨心︰「順其自然囉，有時個腦會話畀自己聽，當下想寫啲咩。（寫歌畀老公？）暫時寫唔到一首歌畀佢，哈哈！」

 

Robynn&Kendy於2012年成立，去年三月宣佈休團。

 

　　多了媽媽這個角色，Robynn認為在音樂路上也多了一份意義，就是希望啟發囡囡做她想做的事。不過，當提議囡囡與她一起玩音樂時，Robynn卻說︰「千祈唔好呀！都唔係嘅…呢一行太多未知數，但最緊要佢開心；佢想入行都可以嘅，我唔建議，但都唔反對。」

 

學習平衡工作與家庭

 

上月尾生日的Robynn，一家三口staycation慶祝。（IG圖片）

 

　　雖然Robynn不想女兒入行，但她直言囡囡甚具音樂細胞︰「佢好鍾意左搖右搖，有時佢喊緊，聽到我唱歌就會停。」她又笑指囡囡對音樂非常挑剔︰「有一晚我先生特登唱得好難聽，跟住囡囡勁嫌棄咁叫咗一聲；之後我正正常常唱番首歌，佢就慢慢瞓着，佢都識分咩叫好聽㗎。」

 

Robynn坦言生B後專心湊女，「小糯米」對媽咪的歌聲非常欣賞。（IG截圖）

 

　　一談到囡囡，Robynn即流露出幸福笑容，她更自稱是「黐身媽媽」，正慢慢摸索工作與家庭之間的平衡︰「時間上我盡量唔會連續兩日做嘢，因為我好親力親為咁湊；心態上就慢慢摸索緊，好似我拍MV嗰日，由朝早五點拍到夜晚12點，見佢唔到一日，我就會耐唔耐拎個cam出嚟，睇下佢做緊咩，第二日我真係太掛住佢，要餐餐奶都抱住餵，雖然佢已經自己揸到奶樽。」有女萬事足的Robynn不但對家庭上心，亦開始重拾音樂事業，絕對有一堆理由顯出她的優秀！

 

 

轉載自: 晴報

• 

【etnet 30周年】多重慶祝活動一浪接一浪，好禮連環賞！ ► 即睇詳情