股市艱難：啲人好奸、賺錢好難

　　雖然你冇俾三百蚊、去睇黃國英嘅「財力醒覺」，不過我肯定佢唔介意我私人醒佢啲投資智慧俾你。

 

　　香港嘅股評人龍蛇混雜，口水佬、馬後炮、股海暗燈……乜都有。但我睇黃國英喺有線財經台嘅「操盤手記」，佢真係因日日埋身肉搏，而修鍊成好street-wise嘅智慧，而且說話直接、刁鑽、拳拳到肉，佢嘅感受又好笑又好貼地。

 

 

　　今次事隔兩年再開show，佢一身深色禮服（不過你唔係好覺嘅，因為係深灰、少少亮、只係領口、袋口、褲管全鑲有同色錦鍛），以示隆重，又不過火。

 

　　一人單騎，講足兩個幾鐘，應該事前練咗氣功。佢貫徹一向睥視江湖、自瘀自讚、話之你點睇嘅氣度，非常傳神咁表達咗股民嘅火（anger）、辣（辣㷫的辣）、無奈……甚至絕望。

 

　　不過在絕望嘅懸崖之前，我地且臨崖勒馬，聽吓佢有乜嘢鱷魚潭嘅求生秘訣：

 

　　一、香港股市充滿賭徒與騙徒，如果你認為自己兩者都唔係，就係可憐嘅善信咧，正所謂信啱得救、信錯失救，你自己要識走位。黃國英形容自己投資如參加地下賭擋，一聽到有人喊「差人呀！」就立即撇。

 

黃國英的心水港股精選

 

黃國英更心儀的美股陣容

 

　　二、 佢揀股嘅準則不斷與時立進，基本概念係：

 

　　a.擁有核心地段嘅收租股，例如領展，港鐵。

 

　　b.同樣享有地利，兼迎合現代人旅遊意欲，及照顧新生代喜好的優質機場股，如首都機場。

 

　　c.強勢品牌:此乃股神巴菲特必殺股，例如可口可樂，經濟好要飲，唔好更要飲。反之，思捷與PRADA就成了反面教材。

 

　　d.科網股，佢睇好騰訊面書呢啲帝國型科網股，佢地唔駛日日燒銀紙，自己已有龐大嘅平台，因此每年可以花幾十億美元去研發，咁咪發囉！

 

　　三、 短線操作（絕大部分股民都係想短炒），最緊要觀察市場情緒，平時細細注，令自己常在作戰狀態中，一旦捕捉到轉角位，睇準就大大注。佢話睇準嘅話，一年一兩次斬獲已經可以印印腳。我知!咁點先睇得準呀？啲人每次仆入去都以為自己獨步股林、醒過股神架啦！原來佢有秘笈：呢招叫「鑊鑊新鮮鑊鑊金」（冇寫錯，係金唔係甘），即係一見新鮮嘅驚嚇場面（例如沙士），即走，然後觀察，當出現壞消息而個市再跌唔落，即入。嗱！佢眉精眼企，身經百戰，捕捉呢啲大位，可能已係直覺，我哋啲散戶，容易被嚇散、彈散，因而成了大戶嘅美點疍散！

 

　　佢仲提醒散戶：注意新舊經濟嘅交替，同避開債高嘅民企。

 

　　從玄學角度看，農曆五月（甲午）、六月（乙未）都可能表面風光，實有暗湧，至農曆七月丙申月，天干地支與年重疊，兩火鬥雙劍，想會在經濟或政治層面上引起大衝激，即大鑊，亦可能有天災人禍。希望我們這雙黃，冇令你走寶，有助你走甩啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票