防火防賊防情婦

　　中港台三地富商聚在一起，名為聯誼，實則研究如何發、如何滾。

 

 

　　此夕一名剛加入的港商，向這班富商的老大討教：「反貪已有一段時期，不賄就一事無成，賄咗就冇一刻安寧，大哥，你點睇呢？」

 

　　「事情慢慢嚟，點都要努力建構人脈嘅，不過今時今日，做事要非常小心，高級嘅領導，現在已全面謝絕應酬，佢地話有事就到佢地辦公室傾，千祈唔好請客送禮，唔好害佢地！」

 

　　「咁如何滑潤關係呢？」

 

　　現在受賄可以化整為零，即分出去俾「口靚」收；或者你中有我，我中有你，即係不同利益集團嘅高官，都喺其他集團安插自己馬仔，互相牽制，一齊掠水。」

 

　　「嘩！咁咪好多陷阱？」

 

　　「講到陷阱，老弟，同你講句心腹話吖……」

 

　　原來新丁好識做，今夕帶來了陳年茅台、日本威士忌同加拿大冰酒，正好為炎熱天氣降溫。佢除咗識貢酒，仲識擦鞋，老大唔只飲到high high地，亦被捧到high high地，所以吐露真言：

 

　　「喺大陸，記住：防火防賊防情婦！」

 

　　「哦？」

 

　　「防火即防真火與假火，假火即無論是官還是官旁邊嘅，見你有乜危難，都可能趁火打劫。防賊就係要防外賊與內賊，有時黑起上嚟，可能全民皆賊！至於情婦，我最近差啲領咗一單！」

 

　　「大哥，你眉精眼企，都有危險，是否動了真格？」

 

　　「唉！少少啦。話說我去上咗個著名大學嘅EMBA課程，識咗位美艷同學，好咗一排，一日佢突然殺上我寫字樓搵我，面色凝重，話：

 

　　「我有咗！」

 

　　我立刻耷低個頭，呷一口極品大紅袍，借Ｄ官威，然後施施然答佢：「我紥咗囉喎。」

 

　　只見佢面色一時間急變，由白變青、由青變紫、再由紫變紅，不過佢真係叻女，立即展現如花笑容講：

 

　　「唏！我講笑暏。」

 

　　我直望住佢嘅水汪汪大眼睛話：「嘻嘻！我都係。」

 

　　老弟，你記住，佢地嘅資源財力架構，係銀紙、房子、孩子、妻子，一級一級咁向上奮鬥，目標同定位都好清晰，你喺佢任何一級，都可能領嘢，老弟，睇路啦！」

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇