嫁入豪門做富婿 此面相差少少！

　　時局充滿矛盾顛覆，現實亦泛濫著表裏不一。

 

　　這是個豪門女婿的吊詭故事。

 

　　他本來是金融才俊，一表人才，不過因為hea，所以撈得麻麻掂。

 

　　因生意關係，他認識了一位富家小姐，太子女對他頗有意思。雖然他已有妻室，不過為了實現其直升機青雲夢，他決定離婚。

 

　　其妻亦唔嘢少。他們本是銀行同事，他到外國留學，並非P.H.D，而係P.H.T，即係Put Husband Through (University)，就好似古時啲痴心女子，贈金供愛郎上京赴考，現代版就係老婆供老公讀大學，結果又差不多－被飛，不過這裏有個Modern Twist，她雖然當年被愛情矇了眼，現在卻開了竅，一口咬住要負心漢全副身家。

 

　　他盤算入得豪門，就等如入得金礦，裸離就裸離啦！

 

　　從投資角度看，妻子及時感情止蝕，財務止賺，得以本利歸還。丈夫則財色兼收（所謂色，此處指新人肥肥白白，就是顏值不高，也斤両十足）可謂雙贏！

 

 

　　被剝離了婚銜及資產後，他正式迎娶這工業王國的千金，滿以為可以憑自己對財技的掌握，在集團內呼風喚雨。誰知所有重要山頭，已被太太的哥哥們盤踞了，他只撈得個發展中國家分行的主席虛銜，冇馬冇權冇牙力，不過有錢——每月八萬大元，港幣！

 

　　此銀碼當然可以讓打工仔養妻活兒、供樓供車。但在富貴人家來說，真係零頭個零頭！

 

　　他滿肚子牢騷，逕向外父投訴。

 

　　這位「終極大老闆」的回答是：

 

　　「你而家食我嘅、住我嘅。出街有車坐，買嘢有老婆找數，你完全唔使出家用，要錢嚟做乜？八萬蚊，使唔哂啦！」

 

　　從相學角度審視，此相屬富中假局，即看似富貴，實在蔽翳！最主要係此人有前冇後、有型冇勢。即喺前面睇就有型有款，後面睇就冇陣冇勢，因為前面看似氣宇軒昂，後面Pat Pat 稍薄，卸晒！所以雖為富婿，仍然日日騰來騰去，陪老婆Shopping，隨時候命！

 

　　有人可能覺得係好工，不過未必輕鬆。你諗吓，廿四小時服務、年中無休隨傳隨到，唔知算係筍工定苦工呢？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇