【2018環球預測】今年會打仗嗎？

　　周末夏威夷出現導彈警報虛驚，今年真會打仗嗎？

 

　　好意先生認為會。

 

　　立春後便是戊戌年了，戊戌兩字皆露械（此處與風化案之露械不同，但各有各險），都有戈字尾，戈為古兵器，長柄前端有橫刃，裝上矛頭，便成為㦸。

 

 

　　戊戌有兩㦸雙對之意，小則針鋒相對，咁都濕濕碎；大則飛彈互投，烽煙四起。好意先生認為狗年會有戰事，弄到雞犬不寧。

 

　　「戊戌兩字皆戰字尾，戰爭在所難免！」他說。

 

　　這麼影響天下蒼生的大事，我當然去找其他高人印證啦。

 

　　子平高人將立春八字排開，認為都有可能。

 

　　戊戌年八字：

 

　　戊土　戌土

　　甲木　寅木

　　丁火　卯木

　　庚金　子水

 

　　他認為此局火甚旺，因此D人發火唔奇，有戰火亦唔定。火旺理據可能比較technical，我盡量用輕鬆嘅方法演譯，你若冇興趣研究，可以「飛閱」至時間地點一段。

 

　　立春八字嘅主角係丁火。

 

　　一、丁火座下係卯木，木生火，已非常有「底氣」。

 

　　二、丁火生於寅月，寅木在春當令（木旺於春），即係有個得力嘅阿媽照住。

 

　　三、丁火貼身有甲木生扶，甲木有寅木為根，即係老豆都唔嘢少，而且甲木生丁火，又係錫到燶。

 

　　四、日柱丁卯隔籬嘅時柱地支為子水，水生木，打橫生卯木，連理月柱嘅寅木，一齊雙木合壁，開咗年柱戌嘅火庫，令本來入墓嘅火，得以超生，於是地支嘅子、卯、寅、戌就打橫掃過去，形成一條龍服務，係火龍！因為此時火即木，木即火（係咪幾玄呢？）即係有一村人做佢後盾，源源不絕發功。

 

　　子平高人判斷此局為從勢格，因為木火有根，勢太強，本來可以洩火的一點庚金又要洩氣生子水，太弱不能用，所以他評應以木火為用神，金為忌神。

 

　　我則戲稱此局為「富二代八字，身強而多人寵，火焰囂張，祇好順擸，因此時柱天干一點庚金特別篤眼篤鼻。子平高人根據這思維，作出以下推測：

 

一、時間：

 

　　農曆七月八月為庚申、辛酉，天干、地支皆金，容易撩起戰火。

 

二、地點： 

 

　　西屬金，中國之西為中東。美國已攪到中東立立亂，特朗普又無啦啦承認耶路撒冷為以色列首都，擺明唯恐天下不亂，好讓共和黨D金主軍火商有生意做。（好意先生也認為中東最熱門，美國突炸北韓也有可能。）

 

　　關於戰禍的威脅，子平高人覺得就算打唔成，形勢都好險，可謂一觸即發，所以佢傾向農曆六月盡量揸現金。不過時年惹火、月份唔好，可以應在天災人禍、政局動盪、恐怖襲擊、重大意外…等，不一定應在戰亂，更未必長期打擊經濟。所以各位今年宜緊貼時勢，睇路睇位，隨時諗計！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇