【少男最得令？】從逆齡大叔身上學永遠保持魅力秘訣

　　點解而家係年青人嘅世界？原來我地處於洛書地運中嘅下元八運（2004－2023），呢廿年專發少男。

 

　　少男可謂當時得令，所以年青先鋒引領產業潮流、青春偶像橫掃樂壇、Mark Zuckerberg廿多歲已殺入世界富豪榜，今年仲榮膺世界之最，真係後生可畏、佔據地球！

 

　　有啲青年覺得長者係過時嘅生產機器，應該送去廢鐵回收廠，所以叫佢地做「廢柴」。

 

　　不過廢料仍然有燃點價值嘅。

 

　　老嘢們以滄桑嘅體驗、豁達嘅心態、乾澀嘅幽默，描述經過一輪人生衝刺之後走落山嘅景況，幾好笑！

 

　　以下係攪笑耆英嘅集體智慧：

 

一、人生苦短，要常微笑——趁你仲有牙！年長嘅，笑一笑，十年少，秒速年輕十歲，年輕嘅，笑一笑，打開好多本來關閉嘅門。

 

二、「早睡、不準周街走、不準去wet！」呢啲都係年輕時嘅懲罰，現在變咗年長嘅養生之道，要日日做。

 

三、未有Internet之前，我地嘅父母係點kill time嘅呢？我問咗我嗰十一個兄弟姊妹，佢地都口啞啞。

 

四、人老有好處，當「人渣」仲未開口之前，我一早洞悉佢係「人肉垃圾」！哈，人老精，鬼老靈！

 

五、我嘅曾祖母喺兒孫大聚會上，突然陰陰咀笑。我地問佢笑乜？佢答：「你哋出現喺地球，完全係因為我一次嘅性高潮！」

 

六、有理想唔怕遲，但如果你想愈嚟愈青春呢，唔好傻啦！

 

　　不過，逆轉年齡又唔係完全冇可能噃。凍齡女神唔講，因為唔知係咪科技產品，最近報章訪問咗四位「登六」型男：60歲嘅單立文由深夜三點都未瞓，變成早睡早起，謝絕黑眼圈。61歲嘅苗僑偉好少飲酒，只食七成飽，謝絕大肚腩。61歲嘅梁家輝以做家務、放狗仔為keep fit秘技，不過佢有六隻狗，運動量肯定唔嘢少。64歲嘅任達華有鐵一般嘅意志力——食得清淡、飲得水多、游水舉鐵跑步，練就鐵一般嘅腹肌。

 

單立文

苗僑偉

 

　　從呢啲逆齡大叔身上，妙齡人士可以偷到唔少「蹺」。本文開篇提到嘅八運雖然明益少男，但唔包括純發白日夢一族，因為八運卦象屬艮，代表山，即係成功要積聚、要實幹，因此頭十五年已經大浪淘沙，淘走好多冇料start-ups，年青人要趁仲有五年，趕緊借鏡前人借慧，參考一下保持實力、魅力嘅妙計。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票