2019-08-22
【笑話四則】狂潮中的狂想、狂插、狂call、狂飲
外面風頭火勢,損傷難計,我地升斗市民,要搵個空間、笑一餐。
狂想
現時搵錢艱難,呢條蹺行得通就好咧!
銀行櫃枱前。
「唔該!我想開個聯名戶口。」一客戶講。
「好呀!先生,麻煩借個身份證嚟睇吓。仲有,聯名戶口另一位係邊個?」 銀行職員熱情招呼。
「邊個多錢就邊個啦!」
狂插
我喺一大百貨公司工作,專門負責歡迎顧客。近來示威不斷,遊客銳減、市民稀疏,老細吩咐:待客要特別殷勤。
今日,有個特別醜、特別「騎呢」嘅女人,拖住兩個細路入嚟,一路行一路鬧,聲震四方,潑極。
我非常有禮咁躹躬:
「早晨!歡迎光臨。呀!小朋友好可愛啊。係咪孖仔嚟㗎?」
「梗係唔係啦!一個五歲、一個七歲,點會係孖生啫!你係眼盲定係低B呀?」
「兩樣都唔係。我只係唔相信有人會同你訓兩次啫!太太,購物愉快喔!」
我老細後來搖搖頭話:
「你明顯唔係食呢行飯嘅人!」
狂call
警察疲於奔命,急急招募新丁,面試時問:
「如果要你拘捕你阿媽,你會點做?」
「我會狂call搵支援囉!」
「你阿媽單拖咋喎。」
「咁睇吓喺邊囉,阿sir,我阿媽隨時可以喺元朗吹雞㗎喎!」
狂飲
運動達人:「做運動會令人睇嚟靚D,尤其是冇著衫嘅時候。」
醉酒達人:「老友,酒精有同樣神效喎!」
各位,你想參加「運動」,定想飲醉冇眼睇呢?
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》運動員強大心理質素如何煉成?張小倫分享最挫敗經歷,及後怎樣重整旗鼓?► 即睇