【最緊要夠人性化】User Experience竟然係從男左女右開始？

　　成日講User Experience (UX) 用戶體驗，其實呢件事早喺好多年已經開始緊，而近年UX慢慢獨立成一門專業，公司更會將用戶體驗列成獨立部門，亦因為香港呢方面嘅專才唔多，所以有啲UX專才嘅人工係幾好。除咗日一般大眾常接觸到offline 嘅 UX之外，而家online 嘅UX亦十分重要，每個介面、相片，甚至每一個button都十分講究。但其實最早期、最多人熟識嘅用戶體驗，並唔係巴士、地鐵上嘅扶手放係邊個位置，亦唔係馬路上貼係地下「望左」、「望右」嘅指示，反而係最為人熟識嘅「左上右落」同「男左女右」。

 

 

　　男左女右除咗喺玄學睇相有用之外，其實UX喺好多生活事情上都將男女分開左右／右左。以衫鈕為例，男女裝嘅衫鈕係有左右之分，扣鈕嘅方法都唔一樣。坊間對男女衫鈕左右嘅說法有好多唔同嘅版本，好早期嘅時候，有衫鈕嘅衣服係有錢人玩意，加上以前重男輕女嘅關係，女士（老婆／女僕人）係要幫男士扣鈕著衫，之後先到自己著。為咗女士較易適應扣鈕嘅方法，裁縫將男女扣鈕嘅方向變成相反，咁樣女士幫人扣鈕或者自己扣鈕都好，方向都會一致。另外，男女分左右喺餐廳或商場等等嘅洗手間亦好常見，記得早年大多會以男左女右為藍本去放置廁所，但唔知點解近年嘅商場酒店等等都慢慢放棄咗呢個概念。

 

　　另外，左上右落以前常用於電梯同道路上，日本有地方就連行人路都係依呢個方向行走，市民去到邊都會自然地靠一邊行，令人流更順暢。但近年鐵路公司開始慢慢放棄呢個概念，只保留一條電梯上「靠左上、靠右企」嘅概念，但兩條電梯或者道路嘅上落，就已經冇咗呢個概念，每次去到唔同站、唔同電梯位都要重新適應，對於我哋呢啲上一代、習慣左上右落人流嘅老人家呢講，有點兒古怪。

 

　　現今公司要制定campaign或者product時，好多時都欠缺「生活化」同「人性化」嘅概念，經常做咗一啲連自己都唔會用嘅設計／諗法出來。其實要將一個好嘅UX放入其中，第一件事必定係「由自己出發」，之後再用數據去支持呢個UX。所以當我哋做一個UX前，都會做不同嘅UX Exercises，例如： 

 

1. 多數先做「追蹤」exercise，觀察／追蹤每一個人係自然情況下對該事情嘅行為同反應，有時會仔細到連使用者眼睛望嘅每一個方向、左右手每一個動作嘅先後，都會研究在內。

 

2. Research 同focus group亦非常重要，目的係希望以數據主導設計，搵出大方向嘅同時，亦為focus group制訂藍本。

 

3. 而做focus group時，除咗會訪問參加者相關嘅問題之外，亦會叫參加者一齊參與設計，設計專屬自己一套嘅產品／服務，就好似以下「雪櫃」exercise 一樣，參加者自行設計雪櫃外門同雪櫃內間格，然後根據佢哋設計嘅原因搵出最後答案，正真實踐「由自己出發」嘅概念。

 

 

　　如果要深入研究，UX可以係一件好複雜嘅事情，但當然佢亦有自己簡單嘅一面。其實大家日常生活上都會不停地接觸到UX，只要用心去分析每一件事，你自己都可以建立一個UX嘅初型。做marketing同UX 一樣，每件事只要望遠啲、望多啲，那怕係左上右落還是係男左女右；公司產品、定係一個小小嘅服務流程，只需一個簡單念頭，就能改變每一個人，甚至一個城市。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇