【向加班Say NO】返工返到死？工作過勞更易患上腦中風、心臟病……

　　印尼喺兩星期前舉行大選，截稿前，點票工作仍然進行中。據報導，有二百七十位選舉工作人員喺點票期間死亡，醫生診斷大部人嘅死因係過勞。同時亦有超過一千八百人因選舉工作而患病。

 

　　印尼政府今次為咗節省成本，將總統、國會同地方議會選舉合併舉行，所以工作人員要處理比以往多五倍嘅選票 （FYI，印尼有超過一億九千萬選民），令點票人員工作量大增。

 

　　雖然呢宗悲劇發生喺印尼，但其實似曾相識。

 

　　「Mary 走咗，但公司要節省成本，所以老細決定唔會請返呢個位。咁唔該大家幫幫手，頂埋 Mary 啲 job。Teamwork, okay?」

 

　　「今次呢個 event 阿姐話要 cut budget，唔可以再用 agency，所有嘢大家要 in house 做咗佢。」

 

　　「Due to budget constraints, we will postpone salary increases for all staff. But on behalf of the company, I’d like to express my greatest appreciation to your contribution in the last fiscal year.」

 

　　公司想節省成本，其實無可厚非，但 cut budget 並唔係榨乾員工嘅藉口。作為上司、老細，唔好以為「拍膊頭」叫下屬每晚 OT 多兩三個鐘好小事，亦唔好以為凌晨十二點 WhatsApp 下屬，叫佢聽朝交 report 係無傷大雅。

 

　　點解？

 

　　2013 年夏天，日本 NHK 有一位女記者因為採訪選舉新聞，一個月內 OT 達 159 小時 （平均每日 OT 五小時），期間只係休息咗兩日。最終因心臟病發而死亡，死時只有三十一歲。

 

　　工作過勞原來會導致心血管疾病。

 

　　同樣喺 2013 年，印尼一個喺廣告公司工作嘅廿七歲員工，喺 Twitter 話自己已經連續工作三十小時，但聲稱仍會繼續努力工作。同日，佢就被發現喺一間餐廳內暈倒，送院搶救後證實不治。報導指佢工作期間，不斷飲咖啡等提神飲品，導致腦部中風而死亡。

 

　　工作過勞，吸取過多咖啡因，原來會導致腦部中風。

 

　　2014 至 2017 年間，日本三菱電機有最少五名男職員因長時間工作而患上抑鬱等精神病，其中兩人更因此而自殺。

 

　　工作過勞原來會導致精神病，繼而自殺。

 

　　工作過勞原來真係會死。

 

　　你身邊未必有人工作過勞而死，但一定有人工作過勞。每日擔心工作過 deadline、擔心個客未過數，其實亦要關心自己過勞嘅身體。

 

　　Stretching too thin can lead to an eventual breakdown, and that’s usually irreversible.

 

　　我除咗關心 marketing 同行，近來亦關心正處理政府「關愛共享計劃」派發四千蚊嘅職員。有合約員工透露，由於人手不足，office 正積壓大量 hardcopy 表格。聽聞佢哋每人每日要輸入最少二百五十份表格，仲要人手 send 確認 SMS。

 

　　呢類新聞其實似曾相識。印尼、日本、香港，你同事、你朋友、你家人同你自己，工作過勞其實非常普遍。過勞死其實離我哋一啲都唔遠。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇