【展覧營銷】疫情下Event Marketer有感：面對面互動始終無可取代！

　　疫情持續，好多展覽活動都被迫取消，唔少公司亦因為咁而陷入難關。

　　幫公司推廣業務嘅實體活動一般可以分為兩大類：大型展覽，或較小型嘅研討會（或有啲公司叫 roadshow）。以下就呢兩大類種活動作一個簡單介紹。

　　大型展覽會 —— 全港有幾個大型展覽場地，包括會展、亞洲國際博覽館、九龍灣會議展覽中心。正常情況下一年間無間斷咁舉辦展覽。除咗大家比較熟悉嘅書展、婚展、BB展等 B2C 嘅展覽（business to consumer，即可以直接將貨物零售畀消費者嘅展會），香港亦有好多 B2B 嘅展覽（business to business，即提供平台畀人傾生意，搵合作夥伴）。展會嘅主辦單位一般以展商租金、向參加者收取入場費，以及賺取展商廣告費作為主要收入。一啲舉辦大型活動（例如超過十萬參加者）嘅公司其實每年只要搞好一場 event 便足以養起整家公司。但如今面對疫情，呢類公司亦已經首當其衝。

　　研討會/Roadshow —— 近年唔少公司都鍾意搞下event，希望喺傳統賣廣告渠道之外加添一份 personal touch，因為透過活動，潛在客戶可以同公司同事直接互動，可以快速令受眾了解公司同產品理念。例如有好多運動品牌會搞集訓班、科技公司又會搞研討會，希望以較軟性方法嚟接觸客戶。但面對疫情，好多公司都已經轉搞 online event，希望繼續保持品牌曝光率。

　　隨住網上活動發展愈趨成熟，消費者亦愈來愈習慣虛擬化生活，例如購物、參與線上會議等。但作為一個 event marketer，始終相信面對面嘅互動交流其實無可替代。即使視像會議有幾流暢，亦唔及面對面一個眼神交流以及一個結結實實嘅握手嚟得深刻。所以而家只希望疫情盡快真正完結，令一眾搞手有工開。

　　政府喺呢一方面又的確走得最前，喺自己訂立嘅限聚令下繼續如期搞書展。我估計一眾業界將不求今次活動反應有幾熱烈，只寄望唔好再出現本地感染。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情