「知識能令你成功，心態才能令你長勝」！ 人人期望「財務自由」，先養成這3個習慣！

　　所有打工仔都有一個夢，希望盡快能夠財務自由繼而退休。其實要實現財務自由並唔係一朝一夕，過於著急會有反效果，但遲遲唔起步就永遠唔成功。嘗試慢慢養成三個習慣，不論財務自由還是職場前途，長線都必定有好大幫助。

 

「投資與唔投資之間」

 

　　投資難，投資成功更難。好多人都試過一時三刻贏大錢，甚至有人一夜致富，不過最後能夠守得住財富嘅人就好少。唔同階段嘅投資者，都會有自己不同投資心得。但久而久之，大多數人都會養成一個「有閒錢就好想去投資」嘅習慣，潛意識覺得「如果錢放喺度唔用，就會輸通脹」，令自己唔入巿或唔投資生意就「周身唔聚財」。好多時亦會因為呢個習慣，而打破自己設立嘅投資手法同規則，過急之下最後贏變蝕。

 

　　成功投資者永遠都係佔少數人，大眾好難學專家般每日都可以錢搵錢。普通投資者應抱有「投資少，但成功率高」嘅心態，都唔好令投資一百次但只得十次成功。要做一個好嘅投資者，除咗要學習價值投資，更要學懂處於「投資與唔投資之間」。

 

「定期下載新手機程式」

 

　　每個手機程式都係經過好多程式設計員精心研究而得出嘅成果，只要細心思考，其實可以發現到背後有好多不同嘅資訊分析，令大家不斷長知識。定期下載新程式，不論係遊戲或工具程式等，嘗試下載後思考其背後意義同原因。例如程式設計員開發嘅目的、程式如何賺錢、介面設計策略、程式發源地嘅文化等，所有資料都反映緊巿場趨勢及不同嘅商業策略，能令你洞察程式以外嘅投資機會及最新嘅賺錢模式。除此之外，定期下載新程式，不斷接受新事物同了解世界嘅轉變，亦係訓練生意頭腦嘅其中一個方式，對投資生意、創造新／被動收入亦十分重要。

 

「每日留意一件事」

 

　　多年前有研究學者對一戶農村小家庭進行研究，為何家庭成員全並未接受過高等教育，智商水平亦並非特別高，但四名子女長大後都成為成功及知名嘅專業人士，如醫生、律師、學者等。後來研究發現，家庭成功之處在於每日晚餐前嘅一個討論。

 

　　每日母親準備晚飯時，父親會安排子女一同進行家庭分享會。父親初時目的只希望與子女多溝通，藉此了解佢哋每日生活小故事。但後來父親從過程中不斷提問及引導內容方向，久而久之培養出子女優秀嘅批判性思维、邏輯思維同提問手法，最後更成為專才。其實每日留意一件生活小事件，從中抽絲剝繭並作多角度邏輯思考。養成「問點解」嘅習慣，能提高投資嘅準確度及成功率，同時亦對職場十分有用。

 

　　財務自由係一場長期戰，難以因為一個股票號碼或一門生意，而快速地成功。知識能夠令你成功，而心態能令你長勝。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇