全球掀辭職潮！疫情緩和打工仔價值觀大改變！巿場空缺未必筍，在香港「伏工」佔多數？

　　近來疫情好似開始緩和，巿面上亦多咗好多新嘅工作機會，求職網空缺滿滿，尤其係中層職位特別多，吸引不少打工仔因此而轉工。慢慢由早前嘅「裁員潮」，轉變成近期嘅「辭職潮」。但香港打工仔「奴性」甚重，好多人盡量都唔會讓自己有真空期，唔敢突然裸辭，所以辭職潮尚未嚴重。不過喺其他國家如歐美地區已經由年中開始加劇，受著不同嘅原因影響更令辭職潮漸趨嚴重。

　　其實唔同國家出現辭職潮嘅成因都有所不同，排除工作量加、薪金減嘅因素，另外仲有兩個主因。第一，打工仔對工作嘅價值觀同追求有所改變。過去兩年非常多人創業，不論你做緊全職、part time定失業，好多人都有自己嘅第二事業。細如簡單網店，大如FinTech金融科技等等，創業個案比疫前以幾何級數上升。創業除咗想賺錢之外，亦反映出打工仔想搵到新嘅自我工作價值。早前外國有調查指出，五成多打工仔覺得疫後自己對現職 / 工作價值觀有很大改變，對比一份長遠而穏定嘅工作，更多人開始選擇多元化而感興趣嘅工作，唔甘於為一份唔鍾意嘅工作佔去自己有限嘅時間，所以「Slash一族」人數愈來愈多。

　　第二個辭職潮原因，係大家對WFH依賴所致。疫情前朝九晚六、長時間喺辦公室工作嘅情景，疫情後已經截然不同。WFH工作模式成為常態，好多大公司過去長時間日子實行WFH，打工仔由初時「抗拒」、到「習慣」、到今日「重視」WFH。更有公司指，疫情緩和後公司嘗試收緊WFH政策，但反而引來員工反感，令辭職潮情況加劇，最後員工要求加薪才肯接受收緊或取消WFH政策。

　　另一邊廂要注意一點，雖然辭職潮湧現，巿場職位供求失衡，但唔代表巿場上嘅空缺必定係筍工，反而「伏工」情況喺香港更為嚴重。據非正式統計，近年大部分剛轉工嘅打工仔反映，新工作都比之前辛苦。其實公司喺疫後裁減十分多嘅預算同人手，「一人多職」情況非常普遍。而另一方面，不論你現職是否筍工，大部分人為求穏定都唔會輕易轉工，怕最後得不償失。所以巿場上工多亦未必係好事。

　　雖然疫情奪去咗好多嘢，健康、金錢、空間等等，但當中總會有所得著。而重點係，每當有大事情發生後都應該回顧一下，再次了解自己人生嘅需要，重新定立自己嘅位置。以上類似「報復性辭職」嘅情況，令人值得反思。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！ ► 立即行動