正常人，最怕衰，因人要面樹要皮，邊個會想衰在人面前？尤其自己緊張的人，包括父母、親友、上司、同事⋯⋯當然，在下屬面前衰，更冇癮。所以，一個「衰」字，會產生無限能量——正或負。

　

　　負方面，為做人「唔衰得」。須知，做人總有極限，尤其是體質、技術及天賦不如人時，衰，乃正常，必須認命。尤其是運動員，永遠只得一個冠軍，其餘全部為敗將。若不能接受輸或衰，乃不成熟表現。最弊唔忿輸或唔忿衰者，唯有打茅波，用小動作、陰招，或服藥，影響賽果。結果呢，東窗事發，例如運動員或騎師食禁藥，就算贏出亦被奪金牌，更可能終身罰停賽。所以，做人需要時一定要接受輸及接受衰，心態才成熟，才會再苦練，等待東山再起。

　

　　今日小弟主題，其實想講「衰」的正能量——唔想衰。任何人，有這種心態，就會發奮盡全力，因不想辜負身邊人對自己的期望，所以，一是不上戰場，要上，就必定施展渾身解數，交出最佳成績。

　

　　我如今退休生活有保障，並非單靠長俸（事實，根本不足以支付家母的護老院費用），只因多年來投資成績不俗，年年跑贏通脹，算是理財有道。

　

　　為何理財有道呢？全因唔想衰。因多年前開始，在電台主持節目，每日要與財經專家過招，此外，又每周在財經刊物寫分析，所以，為免影響形象，表現得太無知，於是被逼或自願，花大量時間鑽研投資之道，尤其股市。

　

　　終於，有一大發現，令個人財富不斷增加，就是——盡早購入與政府直接或間接有關的股票，只買不賣，長線必大升—包括港鐵(00066)、香港交易所(00388)及領展房地產信託基金(00823)。原因簡單，因這類股份，長期受盡政府政策保護，又或之前由政府管理（百分百未能發揮商業潛能！）所以，一旦市場化，就會爆出利潤火花！此外，公司業務通常是業內龍頭，市場潛質無限，不太受經濟周期影響，盈利穩妥，且有規有矩透明度高，董事局不會蠱蠱惑惑愚弄小股東。所以，就有如廣告口號「長途佢贏哂、冇人夠佢跑！」

　

　　事實，懂計數又心水清的讀者，必知以上三隻股，由上市至今，升值加派息，令由第一日開始揸的投資者獲利驚人。對！最少的領匯，上市十年，已升了七倍！

　

　　下個目標，留意機管局！

　

　　我現仍繼續寫財經分析，為「唔想衰」，不停有發現，但不在此一一細表了。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇