2019-04-16
快樂退休——重溫做人之道ABC
做人，有人話好難，其實，看通了，你肯做，好易。
多年前，因要游說倪匡客串做《晨光第一線》客席主持，主動與這位前輩接近，結果，斎聽佢說人生，已悟出不少道理，終身受用不盡。
倪匡是我的啟蒙老師，助我開竅
舉例，同佢食飯，去到邊都大受歡迎，並不單因倪匡是大作家，而是，佢懂得「貼士俾在前頭」的道理。
一般消費者心態，皆是——你先對我好（服務周到），我才對你好（俾貼士以示對你的服務打分）。倪匡做法相反，我先對你好（豐厚貼士先俾），以示尊重。結果顯示，倪匡長勝！
因為，任何樓面工作人員，上至經理，下至普通侍應，皆非常珍惜這種罕有客人。於是，只有倪匡揀食肆，而不是食肆揀倪匡。
遇上好的廚師及樓面工作人員，記緊表示欣賞
從此，恍似打通我的思考經脈！
首先，用在工作方面。當同事人人根根計較，希望付出一両力，收到一斤錢時，我倒轉，先付出一斤力，看上司怎回應。結果是，錫到你燶，升級加人工湧住來。罵其他人都不駡你，因你屬「罕有人種」。我之後經常與年青朋友分享經驗（有幾多聽完開竅唔知！）：「若你是個斤斤計較偷懶呑卜的打工仔，你當然被上司老闆輕視，因通街都是你呢類人，怎會受重用？只能做一世『打工浮萍』。但若你永遠能做到超越上司/老闆的要求，咁就變皇帝女，人人搶住用你，又或，跪住請你唔好離開。點解？正因你是『罕有動物』。如此，你即變人上人，備受重用，升職加薪外，分分鐘老闆拉你入股以免失去你！」
打工仔千千萬萬，突圍而出，優勝劣敗，道理簡單
好嘞，講講朋友。不少退休人士呻到樹葉都落：「唉，世態炎涼呀，一旦無權又冇利用價值，昔日稱兄道弟者，全部星散喇！」
講這類怨言的「前高層人士」，肯定長期做高位做到懵咗，以為昔日別人是巴結佢而非巴結佢擁有的公家/公司權力。
任何退休者，若「朋友」全部一哄而去，意即，佢從來沒有朋友。點解冇？咁大個人，學吓反思啦。開竅後，從頭來過，未遲的，就是，先學做一個「好朋友」。
自己先做個「好朋友」，即可有權揀朋友，因供應不斷也。
套用文首倪匡理論：若你是個好朋友，那怕沒有朋友？
至於，要怎樣才能成為一個「好朋友」？簡單，你能令別人與你相處時feel good嗎？
甚麼是feel good? 唔再畫公仔畫出腸嘞，希望你有慧根啦，哈哈！
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
