情迷「露露檸檬」

　　一件奧運戰衣激起千重浪，令兩個運動服名牌，在毫無心理準備下，一個無端端火箭升空，一個慘食「關公災難」，形象插到海洋底，真是有點無辜辜！

　

　　事實，專業運動員皆知，甚麼運動穿甚麼戰衣，最為理想。現今的衣著，已介入高科技，全部為不同運動在剪裁及用料方面，精準設計。點解同是一件T恤，可以價值由幾十到幾百？唔好問，著過你就完全明白。

　

　　小弟乃「退休阿叔」，本來對衣著，不甚了了。 覺得男人old dog，無需姿姿整整。

 

平時老友聚會，個個享受隨意的大叔品味。

　

　　不過，家中的「肥女B」，自幼天生時裝觸覺（Fashion Sense）敏銳，對為父平日的亂嚟配搭穿著，非常不滿。 故此，出口相勸：「肥爸。你假假地都係KOL（假假地？），成日要出去講talk又接受訪問，尤其呢輪新書出版，頻頻曝光，著到成個『佬』咁，唔得㗎。嗱，花少少服裝費，我替你設計個新形象啦，保證年輕10年！」

　

　　係真唔係真？不過，既然肥女兒一臉熱誠，好啦，交五千大元俾佢執衫啦。

　

　　結果，佢一嘢就帶咗我去海港城間Lululemon，挑咗一套深藍西裝。

　

　　「肥爸，如今的戰衣 ，冇人再咁老土西裝配襯白恤衫領帶皮鞋㗎喇。嗱，西裝之內，襯件白色冇領T恤就變型仔㗎啦！重有重有，帶你再去買對全白波鞋，咁就變絕配！」

 

早年為「肥女B」客串做模特兒，已經笑為父似老土大叔。

　

　　「肥女B」眼光如何，大家睇睇相就知，冇得呃。為父將會著住佢的「指定戰衣」出席七八月所有講座及訪問（見圖），大家認為效果如何？

 

近日曝光，聽「肥女B」意見，改穿lululemon西裝，有乜唔同呢？

　

　　伍家朗本來選穿Lululemon汗衣上陣，因特質為通爽、柔軟、透汗、揮發力特強。 無論幾激烈運動，衫也不會「撻」在身上， 造成不舒服感覺。

 

穿上優質運動衣，伍家朗的發揮，零舍不同。

　

　　對，Lululemon乃貴價貨，但四個字——物有所值。你可等佢大減價才掃貨可也。

 

lululemon形象低調，但全球知音者眾，近三年股價不停飆升。

　

　　講到一分錢一分貨。深深記得初到香港電台工作，型佬上司拉我講：「阿碌， 快買一套深色西裝做戰衣，必須意大利名牌，投資一萬元，剪裁貼身質地柔軟，非常耐看耐著。切勿為慳錢買一兩千元下價貨，效果差好遠，觀感完全兩樣㗎！」

 

幾十年前香港電台型佬上司教落：「西裝是戰衣，冇得慳！穿上便知甚麼叫貴得合理。」

　

　　昔日上司的指示，百份百對。今天「肥女B」給我的忠告，更是百份之一千命中目標！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

•