《Online有話兒》別人恐懼　股神今次不貪婪

　　正所謂：「再鋒利嘅刀都有生鏽嘅一日。」「股神」巴菲特於香港時間5月3日舉行視訊會議，喺會上除咗公布巴群業績之外，巴老佢竟然同大家承認：我錯了。究竟巴老點解呢次要同大家認錯呢？呢次同大家做個懶人包，同大家總結下巴老係呢次個會上「些牙」啲咩重點消息啦！

 

　　「股神」巴菲特於香港時間5月3日舉行視訊會議，喺會上除咗公布巴群業績之外，巴老佢竟然同大家承認：我錯了。究竟巴老點解呢次要同大家認錯呢？呢次同大家做個懶人包，同大家總結下巴老係呢次個會上「些牙」啲咩重點消息啦！

 

（Shutterstock圖片）

 

1.　買錯航空股

 

　　「我承認喺投資航空公司上面犯了錯誤，航空業確實發生好大變化，特別而家(航空業)具有挑戰性同困難，係現今航空業都停工嘅情況底下，相信班CEO都唔係幾開心。」

 

（Shutterstock圖片）

 

　　唔講以為股神幾時做咗一個「壞咗嘅人」，原來係講緊佢呢次投資者航空股損手爛腳，喺會上佢已經講清楚，巴郡已經沽清美國四大航空公司嘅全部股份，雖然無講到買入賣出價，但已經講到明「蝕住走」，不過好彩係大手交易，未必真係輸到入肉嘅。股神表明唔睇好航空業，並點名話，懷疑疫情後市場係咪需要咁多飛機，唔知波音公司未來前途會點。

 

　　波音呢次真係「躺著也中槍」。

 

2.　控制投資心理質素

 

　　「巴郡到目前為止都未好似2008年金融危機時期，向一啲企業提供財務支持，因為目前確實無咩值得吸引。」

 

 （Shutterstock圖片）

 

　　還記得股神金句「別人恐懼我貪婪」嗎？，但呢次佢都要睇定小小，證明個市到今日都未係幾睇得透，連佢都唔敢貪婪落去。佢重話而家或者係買入股票嘅時機，但要有對抗疫症嘅長期準備，因為買咗可能隨時坐艇，要好好咁控制自己持貨心理質素。

 

3.　借錢的最佳時間？

 

　　「而家對於全美國人嚟講，可能係借錢嘅最好時間，但好多人都未必願意肯借；對巴郡而言更加唔會做，因為公司已經回籠一部分資金，而呢啲將用在刀刃上。」

 

（Shutterstock圖片）

 

　　巴郡所持有嘅「一部分資金」可能係幾間大龍頭公司夾埋嘅市值，據知巴郡而家手握1370億美金嘅現金流，但反而未有進行大型投資或者買入，呢一點大家都估佢唔到。不過畀你估到嘅仲係股神？

 

4.　無人會知油價會點

 

　　「無人知道油價會點，17、25蚊美金都有可能性，但如果油價一路處於低位，將會有大量不良貸款，無法想象到持有油股嘅會點。」

 

（Shutterstock圖片）

 

　　巴老當年投資中石油(00857)低揸高沽，一戰成名，不過都已經係好耐好耐之前嘅事。巴老早前投資過美國西方石油，但係年初至今股價跌近七成，巴老帳面虧蝕最少5.6億美金，重未計佢去年用100億美金買入西方石油優先股，呢啲叫「眼淚，在心裏流」。

 

5.　接班人呼之欲出

 

　　「如果可以的話，我會選擇一個智商無咁高，但判斷時唔會點出錯嘅人，我嘅老師係智力上可能係全球Top3，但係佢做嘅判斷就未必係咁。」

 

（Shutterstock圖片）

 

　　呢句說話可能已經透露咗巴菲特未來接班人選，其實巴老今年8月就已經90歲，佢已經表明自己有接班人選擇，雖然佢無講到明，但呢次大家都估緊都係巴郡再保集團CEO簡恩同巴郡能源公司CEO亞伯兩者之爭，而呢次業績會議上，巴老更點名讚簡恩係一個人才，而且熟悉保險業，係獨一無二嘅人才咁話。相信大家都好快知道邊個係巴郡嘅接班人啦！

 

額外篇：必須學識會計

　

　　「你必須要學識會計，因為對於投資者而言喺一種語言。」

 

（Shutterstock圖片）

 

　　呢一句就係今年3月幾嘅時候巴老接受訪問時呼籲所有投資者，然後佢就開始想當年，話自己11歲買股票時就自學埋會計，佢當時更呼籲大家唔好信圖表派同買賣窩輪！眾所周知巴老係相信「價值投資法」，而佢所認為嘅技術分析，係應該研究股票不同時期嘅走勢，因為搵到一隻啱嘅股票，五年內未必有起跌，但五年後你好好開心咁讚嘆自己買入呢隻股，而研究財報係需要一定嘅會計知識，所以佢先呼籲大家要學會計。

 

　　「擁有正確投資態度比起任何分析更重要。」呢句說話係巴老送畀大家。

  

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇