《Online有話兒》名人紛紛唱淡美股，大崩盤即將來臨？

　　不論美國「放水」定吹緊「收水」，美股都照樣破頂可也，呢種景象真係嘖嘖稱奇；不過，呢邊破頂之餘，另外一邊就唔少大淡友日日唱淡，最近唔少名人都公開發表言論，指美股已經到達歷史新高，短期之內將會睇到大崩盤，唔少網友表示：「究竟跌未啊？講咗十年口都臭啦！」究竟淡友可以睇得有幾淡？

 

 

（Shutterstock圖片）

 

《窮爸爸富爸爸》作者：史上最大崩盤將來臨！

 

 

 

（維基百科圖片）

 

　　羅伯特．清崎自從出版《窮爸爸富爸爸》呢本書之後，經常都會就經濟及股市發表言論，而佢最近又係自己嘅推特上發出發出警告，表示史上最大嘅崩盤就快來臨：

 

　　「好消息係發達嘅機會會係崩盤期間發生；但壞消息係崩盤將會漫長，盡可能買入黃金、白銀及比特幣。」

 

　　而清崎本身好似好推崇比特幣，佢早前都曾經出過Post，話史上最大嘅泡沫即將來臨，呼籲大家買多啲期貨商品，如果比特幣跌到落二萬四美元關口的話，就要買多啲。唔知佢手持幾多虛擬貨幣呢？不過如果美股大跌，虛擬貨幣可能都係一個良好嘅避風港嘅。

 

知名經濟學者鄧特：美股未來6周將「閃電式」崩盤

 

（Harry Dent的Facebook圖片）

 

　　美國知名經濟學家、鄧特公司（HS Dent）創辦人鄧特（Harry Dent）今年3月時候就曾經警告，美國經濟將會陷入地獄，最遲會係今年6月底前，美股將會上演「史上最慘烈崩盤」；而係5月尾再警告，美股係未來6周內將以「閃電式」崩盤，最終跌幅可達65%至80%。

 

　　鄧特認為，美國瘋狂印錢同實施刺激經濟措施，雖然令經濟勉強撐住，但新冠肺炎卻令問題持續惡化，而美國高額嘅債務問題、資產泡沫以及糟糕嘅人口發展，當多個因素結合之後，將會令金融市場疲弱。不過鄧特，而家7月就快到，隔晚美股納指仲破緊頂，說好的股災呢？

 

《The big short》主角原型曾唱淡，現時連推特都Delete埋

 

(網上圖片)

　　電影《The big short》主角原型、美國對沖基金Scion Asset Management執行長貝瑞（Michael Burry），早前先警告過，美股目前處於最大嘅泡沫當中；不過係本月22日，佢就聲都唔聲咁Delete咗自己嘅推特帳號，唔知係佢自己Delete定係被推特Delete呢？

 

　　貝瑞之前警告，好多人沉迷係虛擬貨幣嘅投機性，其實係吸引散戶係崩盤前進場，所以虛擬貨幣如果急跌，蒸發嘅市值堪比一個國家；佢又警告，比特幣價格已經過高，加上瘋狂借貸，將會令虛擬貨幣狂熱加劇，佢又批評美聯儲一直將重心放係防止股市下跌，形容當局係一個「被誤導嘅怪物」，但貝瑞嘅帳戶突然被刪除，唔通係防止被外界干擾，要專心預備研究「大沽空」？

 

撰文：李皆穎

　　

　　

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇