《Online有話兒》狗狗幣又成焦點？富豪們發功啦！

　　股海浮沉，不如幫襯「狗幣」，虛擬貨幣成為近期投資界熱話，而「狗狗幣」（Dogecoin）更有多個大富豪熱捧，除咗狗幣忠粉、特斯拉創辦人馬斯克之外，近期仲有NBA球隊達拉斯獨行俠老闆庫班支持，唔通狗幣又再起飛？

 

 

籃球隊老闆庫班：用狗狗幣買獨行俠周邊有優惠

 

(shutterstock圖片)

 

　　唔知道大家有無睇開NBA呢？達拉斯獨行俠除咗左靚仔球星Luka睇之外，近期球隊老闆馬克．庫班（Mark Cuban）表示，自從3月份開始接受狗狗幣作為付款方式後，交易額顯著大幅抽升，所以為刺激消費，球隊宣布係促銷活動入面，只要用狗狗幣找數就會有特別優惠價。

 

　　而庫班早前接受傳媒採訪時表示：「狗狗幣係一種可以用於獲取商品嘅服務的媒介，而當佢被用作為交換媒介時，狗狗幣係最強大的。」

 

　　咁遲下達拉斯獨行俠ICON個隻馬仔，之後會唔會變埋柴狗呢？

 

狗幣「忠粉」馬斯克都撐庫班，比特幣仲有無運行？

 

　　另一位狗幣「忠粉」、特斯拉創辦人馬斯克睇到庫班呢番言論，已經立即CLS(Comment、Like、Share），因為佢終於搵到知音人啦！並且轉載到自己推特上表示：「我已經咁講好耐啦！」

 

　　大家都對馬斯克會唔會「由比特轉狗」都表示關注，因為馬斯克一開始對狗狗幣都係處於「玩味」態度，但無諗過玩玩下就突然成真！而隨著馬斯克力撐狗幣，令近期幣價由0﹒19美元大幅攀升至0﹒35美元。而目前幣圈就出現咗「新舊幣」之間嘅大戰，新幣（狗幣、柴犬幣）就覺得舊幣嘅系統過時；而舊幣就覺得新幣係大騙局。只能夠講一句：「貴圈真亂。」

 

狗幣威到變成英超球隊廣告標誌？

(shutterstock圖片)

 

　　剛剛重返英超嘅足球隊瓦特福宣布，贊助商Stake.com會同球隊合作，贊助商會贊助70萬英鎊，換取球隊波衫袖口廣告權，而呢個袖口會由原本嘅比特幣圖案，換成狗狗幣圖案。咁威水？

 

　　其實運動圈都同樣對虛擬貨幣有一定程度嘅接納，好似剛剛「含淚」轉會嘅足球員美斯，由巴塞轉去巴黎聖日耳門，其中薪酬合約就包括部分球隊嘅「球迷虛擬代幣」；而F1車隊Aston Martin都接受交易所Crypto.com嘅贊助，反映虛擬貨幣係運動界影響力都日益俱增！

　　

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好