仲有兩個幾月就已經係特首選舉，兩大熱門曾俊華同林鄭月娥，一個就辭咗職但阿爺未批，一個就傳聞已經口頭辭咗等緊遞信。不過，香港另一個政治核心西環，近周已經積極做嘢，為特首選舉結果「萬無一失」而進行摸底，或者正確啲咁講，係「打底」。

　　剛剛就有親政府媒體引述消息透露，政務司司長林鄭月娥會喺下周四(12日)辭職。Tina問過政界高人，高人話公布施政報告之前離開係最好嘅時間，因為從阿爺角度，你係幫特首完成最後一份施政報告先走，有交帶；而從大眾角度，林鄭亦都唔使為落實施政報告負責任，所以下星期辭職之說，應該都幾確實下。

　　林鄭同曾俊華都未正式公布話參選，但西環就已經不斷發功。近周西環好多部長都好忙碌，主要係向佢哋所屬嘅選委界別派發「特首競選錦囊」。不同嘅部長各有各演繹，但暗示嘅主調都係一樣，「林鄭係阿爺屬意嘅下任特首」。

　　據其中一個界別嘅選委透露，部長都好精明，唔會講明各潛在人選嘅優缺點，但佢界別所屬嘅部長，就講明有啲人好圓滑，好識得冧人，但從政以來滴水不沾，辦事能力又唔多高，部長叫選委要好小心自己手上面嘅提名票，唔可以畀一啲唔做得嘢嘅人。選委形容，呢番說話真係講得白過漂白水，雖然無講西環屬意邊一位，但好明顯說話嘅用意就係唔想曾俊華入到閘。

　　不過Tina即時提出疑問：「咦，阿爺仲未批鬍鬚辭職喎，西環部長咁講，係唔係代表阿爺最終都係會畀曾俊華辭職呢？」呢位選委就話佢不得而知，但相信阿爺用「唔批辭職」去落曾俊華閘係非常不智，最終一定要批，依家西環打晒底，就證明有人係想用提名票阻曾俊華衝閘。

　　無論如何，依家曾俊華唔單止係無西環嘅祝福，甚至係畀西環喺鵝頸橋底打緊佢小人，真係未選都要打告急呀！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【雙11感謝祭】雙重優惠、多買多賞► 了解詳情