雙學三子黃之鋒、羅冠聰同周永康，2014年佔領公民廣場一案，政府覆核刑期上星期宣判，最終由之前三人拍一下「Pat Pat」離開法庭，最後要洗埋「Pat Pat」受牢獄之苦，被判6至8個月刑期。

　　三子被判刑之後，從昨日（20日）遊行人數都可以睇到，社會輿論對裁決嘅睇法。唔少人都認為今次法院判決極之不公，甚至形容政府以至法院，係進行緊「政治逼害」，呢一點係最令Tina擔心。一旦香港人真係對我哋一直最引以為傲嘅司法體系都唔再相信的話，香港真係連最後防線都無埋。

　　直到今日，Tina仍然相信，法院入面高高在上嘅法官，個個都係非常獨立咁去睇每一單案件，唔單止係雙學三子，仲有東北案、七警案等等，全部都係依據現行嘅法律原則去判，唔涉及任何政治元素或個人情緒，作為社會任何一員，絕唔應該輸打贏要，更妄言法院裁決係有政治逼害嘅成分。

　　但我所講嘅，只不過係在法院嘅層面，單Case未到法院之前，有無政治元素滲入？負責查案搜證，以至肩負起訴提出上訴嘅律政司部門，有無戴政治有色眼鏡去睇呢？相信各位讀者自己心入面都早已經有把尺，唔使Tina多講。

　　大律師公會前主席石永泰接受一間網媒專訪，提到以上呢點時，受盡雙學三子支持者唾罵。石永泰話雙學三子無畏無懼，就係無懼檢控，「你出得嚟行就預咗要還……應該係求仁得仁」。Tina都想問下三位，如果佢哋衝入公民廣場之前，知道畀人拉係會面對最少一年刑期嘅監禁的話，佢哋係唔係唔衝呢？我相信佢哋一樣係會照衝，因為呢個係佢哋所相信嘅理念。

　　石永泰亦由雙學三子案談到四位立法會議員DQ案，有一句講法好發人深省。「政府將本來屬於政府舞台的事，改用法治手段去解決，『整個舉措是賤』，亦只會換來惡果，逼使法庭作出政治上不討好其中一方的判決，再被人批評法治已死」，呢個先係香港近幾年面對最大嘅危機。的而且確，我哋絕唔應該令到法庭介入任何政治旋渦之中，咁樣對整個社會都無任何益處。我仍然深信，如果裁決係有任何不公嘅地方，最終法律係會還佢哋一個公道，希望三子可以繼續信任法庭，信任香港最核心嘅價值。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇