泛民主派喺年初特首選舉嘅時候，將林鄭打造成為「CY 2.0」，就連競選對手曾俊華亦都用呢個稱號去稱呼林鄭。林鄭係唔係「CY 2.0」暫時就未有實質證據；但社會步入「撕裂2.0」，似乎係鐵一般事實，而撕裂嘅源頭，就係「港獨」一詞。

　　自從大學民主牆上兩周開始有人貼上「港獨標語」之後，事件升溫仲快過微波爐。上周五（15日）由10間大學校長一齊出來高調反港獨，去到剛剛周末更有議員搞集會，將佔中發起人戴耀庭扯埋港獨一齊落鑊大火猛炒。發起集會嘅何君堯仲驚死唔夠味，講「呢啲人唔殺做咩？」，辣上加辣，即時引發社會激烈討論，可以話將呢排嘅撕裂情緒推到去頂峰。

　　港獨議題已經停咗一排，就算梁游案告終，都未見有人炒起。唔好講究竟有幾多人肯企出來支持港獨，Tina相信九成九港人都唔會認為明日香港獨立，香港會比昨日更加好。港獨喺香港根本係無市場可言。所以「真港獨」人士的目的，就係要炒熱呢個議題去引起社會關注，而當權者最佳嘅處理方法，根本就應該係冷處理，唔好日日出來回應加料譴責就已經足夠。一個校園嘅民主牆上面嘅港獨言論，有幾多人睇到？只要唔好煲熱佢，以香港人善忘嘅本能，呢單新聞捱唔過幾日，自自然然咁就無聲無色。

　　之不過，香港社會近年就有一個怪現象，無論係黃定係藍，兩班人都係唯恐社會不亂，總之就係要搞到社會充滿撕裂嘅議題，挑起社會最根本嘅矛盾，兩班人各自爭取佢哋自己嘅政治本錢；自己有無形嘅利益落袋，但就損害咗香港社會持份者嘅最大利益。

　　在此真係希望何大狀等等，如果你哋如你們口中所講，係為香港長遠利益著想，唔好再搞咁多高調動作。校園播毒事件，就由大學自己去處理，再搞唔掂先由政府介入。撕裂香港比起港獨思維，對香港傷害更大！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情