「新一屆」立法會已經復會，順理成章咁政圈焦點聚返去立法會；除咗睇下泛民點樣兌現承諾搞好「議會戰線」之外，Tina 更留意嘅係，究竟建制派能唔能夠齊心一致抵擋泛民嘅攻擊，唔好再因為爭位影相而鬧到上晒報。以上嘅仲有待觀察，不過林鄭就繼續為市民提供茶餘飯後嘅話題。

　　上星期押後施政報告宣讀成為政圈頭等大事，今個星期林鄭政府「再獻新猶」，火藥級數稱得上係烈性級別。今個星期先有報章報道，政府計劃煞停兩元乘車優惠計劃門檻，由現時65歲下調至60歲嘅建議；政府一路無人出來否認，之後建制派不同派別人士，特別係要靠直選爭櫈仔嘅建制派議員即刻舉起「反政府」旗幟，批評林鄭政府之外，民建聯更加一字排開對有關建議表示遺憾。

　　有建制派中人就話，成件事由傳媒率先披露去到建制派群起反對，其實非常詭異。佢指出，一般政府推出咁嘅措施之前，已經做咗一大堆功課，包括財政承擔、點樣防止被人濫用等等；就算依家政府財政急轉直下，呢類惠民政策，講咗出去就係潑咗出去嘅水，好難收得返，市民有合理期望，政府能夠做到嘅，最多只係修修補補或者加多啲措施去防止被人濫用。佢話：「收返的話基本上就係等同政治自殺，喺外國真係暴動都有份，佢之前都政治自殺過幾次，估唔到愈來愈爐火純青」。

　　更令呢位建制人士丈八金剛嘅係，林鄭點解選擇向傳媒披露有關消息去睇民間反應，而唔係先行向直選建制派人士摸摸底先，「行會入面直選嘅建制派，得葉劉係支持取消有關優惠，如果林鄭先同民建聯同工聯會講，兩大黨肯定會力陳反對理由，甚至會幫林鄭度橋，睇下點樣可以修改做到中間落墨，既不失優惠，又唔會加重庫房負擔。所以你話，成件事係唔係詭異之極？

　　不過 Tina 反而覺得，林鄭夠膽提出取消呢個政策，同佢「迎難而上」嘅好打得性格其實非常配合，因為提出取消呢個政策，比起提出落實呢個政策，難度真係大十倍都唔止，我地有一個咁「迎難而上」嘅特首，的確係「港人之福」呀!

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情