從玄學角度看政改死因

　　表決政改前一周，我在皇朝會遇到林鄭，只見她面容疲累、人也瘦了，幾乎唔識笑，沒有了「好打得」的氣勢、神采與光澤。當然，她的氣色未必預示政改之死，大家都知道她只是在做一件吃力不討好的事。

 

　　政改衰咗，我的小江湖亦有一番燥動，一時口水、風水加文字感應的心水合成湧浪，煞是熱鬧。

 

 

　　「好意先生，呢場大龍鳳，以鬧劇告終，是否與某些字有關呢？係主將嘅名字唔掂、定係政改兩字唔妥、還是月破歲破唔吉祥呢？」我問。

 

　　「政改兩個字，都係敗字尾，早提示兩敗俱傷嘅格局啦！」他說。

 

　　攵這邊旁，屬攴字部。我心諗：收貨個「收」字、有效個「效」字、救得番個「救」字，都係攵字旁口番！不過捉機這回事，是看心水的，若順著好意先生的邏輯，我用另一些有攵旁的字，可以串個失敗的邏輯出來：即有些人以為果「敢」，出了個「敝」主意，結果計錯「數」，成盤棋「散」晒，益咗「敵」方，真是搞嘢自「斃」。

 

　　好意先生對政改口號亦有意見：「一定要得個得字，可拆解為要得就要雙方合拍，個得字係由行、日、寸組成，即係不可單獨行動，要兩人同「行」方見天「日」，否則「寸」步難行。」

 

　　今次唔止泛民同建制唔合拍，後者內部亦唔同步，唔怪得輸到石破天崩、真係應景。

 

　　「政改個兩個關鍵日子，即六月十七同十八，前者係甲子日，地支與該月嘅地支午沖，即子午沖；十八日為乙丑日，地支與今年嘅地支未沖，即丑未沖。月破歲破，係咪預兆必敗呢？」我問。

 

　　「係啦！仲有，甲子兩字都係天干地支之首，係起步點，我早提示會變數多，不過估唔到變成咁！」

 

　　「咁從風水角度，又有乜玄機呢？」

 

　　「政府總部呢個建築物上口對下口，爭拗不絕，點會有共識?！」

 

　　今次不止社會撕裂，政黨內部亦不團結，泛民有一人話可以袋住先；保皇黨中自由黨又唔聽民建聯支笛；還有陳婉嫻堅持投票、冇跟大隊離場；公務員亦分兩派，各刊登廣告撐及反政改，真係好多拗撬。

 

　　唔通這個穿窿的政府總部，就代表個穿窿政府專門推出D穿崩嘅政策？若然，今後香港有乜冬瓜頭腐、頭暈身熱，全部可以賴晒佢，真方便！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇