地產商的天堂與地獄

　　樓價持續高企，惹來市民持續關注。以下係一個有關地產商嘅笑話。

 

　　專走精面嘅地產商香咗，浮吓浮吓，竟然撞到個舊伙計。

 

 

　　「老細，乜喺呢度見到你？我而家做咗上帝移民部門嘅接待小組委員，等我帶你周圍參觀吓啦。係呢，你想去天堂定地獄呢？」

 

　　「乜有得揀咩？」

 

　　「有，我地呢度好尊重自由意志嘅。」

 

　　「聽講話天堂好鬼悶，不如去地獄行吓先。」

 

　　佢去到地獄，簡直開心到爆，見到好多朋友，飲緊最靚嘅Chateau Lafite，攬緊D勁索嘅女模，成日有不同嘅娛樂活動，不知幾好玩。嗰度又顛覆咗一夫一妻制度，男女都不需要負任何責任，要愛就愛、要撇就撇，No Questions Asked。仲有豪宅住，管理費、差餉、地稅全免，又冇雙倍印花辣招，地產商開始後悔死得太遲！

 

　　第二日，去遊天堂，嗰度日日要去禮拜堂，唔準講粗口，不得喧嘩，大家著晒禮服，斯文到極，而且日日守齋，仲有醫生每日檢查你嘅身體狀況，一有甚麼三高、糖尿……等，立即要進食特殊餐，真係冇啖好食。嗰度仲奉行一種人間罕有，亦無市場嘅誠信原則，就係如果講大話，頭上會出黑煙，好樣衰！

 

　　第三日，係決定時刻咧。

 

　　地產商對舊伙計講：

 

　　「我都係鍾意地獄，有朋友有靚女有著數，冇規條冇責任冇成本。天堂鬼咁悶，日日唱聖詩，又唔準講是非吹水，句句都要真話，你話幾唔習慣吖！最攞命就係有集體負責制，你知喇！我地習慣將問題掃落地氈底，等人發覺，我已經袋袋平安啦。點會好似天堂咁鬼麻煩呢！我決定去地獄歎世界！」

 

　　點知佢一落到地獄，豪華巨宅、美女如雲嘅想象立即幻滅，變成一片火海，佢燒到屁股都燶埋，正在谷氣兼呻笨之際，見到舊伙計浮過，立即大叫：

 

　　「喂，點解呢度同我當日所見完全唔同嘅？」

 

　　「枉你係地產商，你嗰日參觀嘅係『示範單位』嘛！」

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情