蠟筆都推出手機App？

　　早一陣子睇電視，難得撞正下午兒童節目時段。其中一個廣告賣緊Crayola蠟筆，一樣我哋細細個已經玩緊嘅玩具。蠟筆呢樣玩具一向都非常Straightforward：家長買一盒24色蠟筆返嚟畀小朋友，再畀張白紙佢，然後由得佢哋畫畫填顏色，就係咁簡單。但令人估唔到嘅係，今時今日，蠟筆都有自己嘅專屬App。

 

 

　　Crayola，一家超過110年歷史嘅玩具及蠟筆製造商，近排推廣緊嘅產品叫Color Alive。玩法係叫小朋友喺專用填色紙上幫Ironman、Elsa等公仔上色，然後用佢哋嘅手機App掃描一下小朋友嘅作品，Augmented Reality （增強實景技術） 就可以將紙上嘅公仔「活化」，讓公仔喺手機屏幕裡郁動。玩家仲可以同自己創作嘅公仔合照，分享到社交媒體。我作為一個冇填顏色廿幾三十年嘅人，睇完廣告之後，的確有衝動去買一盒嚟試玩。

 

 

　　AR其實唔係咩新科技，好多唔同類型嘅公司同產品都有用於Campaign之中，其中一個不得不提嘅就係宜家傢俬。

  

　　宜家傢俬喺2013年將佢哋嘅產品目錄（即係好似字典嗰本）加入AR技術，畀用家喺手機畫面裏面預視屋企放咗新傢俬之後嘅模樣。而呢個Campaign另一成功之處在於佢嘅宣傳短片拍得非常得意，成功令用戶仿效，影低一啲得意嘅相片Share畀人，做到Viral Promotion嘅效果（病毒式宣傳）。

 

 

　　除咗宜家，L’Oreal喺兩年前推出嘅手機App “Makeup Genius”亦係得獎之作，頭兩個月已有超過40萬次下載。女士只需要喺App裏面揀選自己想試嘅妝，然後用手機鏡頭如常「照鏡」，個App就會利用AR技術幫用戶「極速上妝」，免卻用戶親自到化妝專櫃試化妝品嘅時間。當然，呢個App亦同時配備完善m-commerce（手機購物）平台，方便用戶試完妝就可以直接喺手機一站式Shopping。

 

 

　　上兩星期提及過Marketing來年其中一個大趨勢係以用戶體驗為先，而如火如荼嘅Virtual Reality同Augmented Reality技術預期將會繼續發揚光大。除咗喺較常見嘅電子遊戲、影視行業外，嚟緊將會有更多意想不到嘅產品同VR/AR Crossover，迎合大家用手機嘅習慣之餘，為用戶帶嚟更多第一身體驗。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】有學者倡60至65歲以下長者之2元乘車優惠，設每月補貼上限700元，你點睇？► 立即投票