司機大佬突然的關心

　　自從手機叫車應用程式推出後，我都幾經常使用，一來因為做marketing的確有需要喺深夜 (或凌晨時份) 叫車返屋企，二來用app叫車，的確為我帶嚟同搭的士完全唔同嘅用戶體驗。

 

　　有一次工作至晚上十一點，我如常用手機app叫車返大埔。那次我叫到的，是一輛Toyota Prius，司機叫Chi Wai。我喺app度見到架車差唔多開到公司樓下時，我就收拾好落樓。落到樓下，我見到一輛白色Prius，車內亮著淡淡嘅藍色燈光。打開車門，我仲聞到陣陣嘅薰衣草香味。

 

　　「Hi，係咪吳生？」Chi Wai帶點靦腆，但彬彬有禮地問。我點一點頭、關上車門，扣好安全帶就開始行程。過咗大約五分鐘，車喺一個紅綠燈位前停下。

 

　　「吳生，你凍唔凍？」Chi Wai問。面對突如其來嘅關心，那一刻我有點不知所措。我以半信半疑嘅態度回應咗一句：「吓？」

 

　　「啊，咁我不如較細啲個冷氣，呢排好多人感冒。」Chi Wai補充道。嗰一刻，我抬起了頭，將視線從手機屏幕轉移到車上嘅倒後鏡。兩個男人、一架車，突然喺倒後鏡中四目交投。

 

 

　　Chi Wai微笑，點一點頭說：「音樂我都較細聲啲。」

 

　　我再回應一句：「吓？」

 

　　「OT完，你休息下。」Chi Wai講完，然後就徐徐開車。

 

　　差不多四十五分鐘車程上，我與Chi Wai嘅交流就這麼三兩句，但我嘅用戶體驗卻是前所未有。我明白無論係搭的士或是叫車，你遇到嘅司機係健談或是冷淡、係熟路或是唔識路都係睇你嘅彩數。但至少，現今多了幾個叫車平台，多了一份競爭，亦給各公司機構多了一份改善嘅動力。落車後，我喺應用程式上給了Chi Wai五星星的評級，然後儲存好電子收據就上樓。

 

　　而家嘅手機及網上平台服務的確顛覆咗好多傳統行業，以叫車服務為例，去到世界各地，你都可以下載到相類似嘅應用程式。其他較為人所知嘅服務仲有餐飲外賣、van仔貨運，同而家好hit嘅眾籌平台 (crowdfunding)等。

 

　　新嘢唔一定好，但我依然鼓勵別人嘗試新產品、新服務，因為試新嘢可以刺激思維，為帶來下一項新產品、新服務提供food for thought。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動