創業時機vs完美產品 IG創始人話你知邊樣更重要！

　　好多創業家都係完美主義者，經常希望自己嘅產品要接近無敵先肯推出，或者想公司有100%完全勝算先開始業務，其實呢個諗法係有啲啲錯。好多今時今日嘅大企業，最初創業時只係攞住個Prototype 起家，推出之後再一步一步將其修正，變成今日我哋大眾見到嘅製成品。 

　　其實好多時產品係咪完美自己未必會知，創業團隊係初創期間日日對住同一件產品，或多或少對產品會有一定嘅傾向性，導致產品不完美，久久都未能睇倒盲點係好正常嘅事。所以去到一個適當嘅時候，一定要將你唔完美嘅產品先同朋友分享，作一個Soft Launch，修改後先再推出市場或搵天使基金投資你嘅業務。

　　以現時好流行嘅社交媒體Instagram 為例，創辦人Kevin Systrom 2010年創業，當年佢每日放工自學寫手機App，用咗幾個月去寫咗Instagram嘅第一個初型「Burbn」。最初Burbn並唔係好似Instagram咁係一個影相、分享相片嘅社交平台，Burbn反而係一個結合咗影相、Check-in、Online Game、CRM等不同功能嘅手機App。Kevin 搵朋友試用Burbn初型之後，跟手再搵投資者商談注資。雖然後來集資成功，亦於Apple Store上架，但因為功能太多，又缺乏整合性，發展空間有限。有見及此，Kevin搵嚟Partner Mike Krieger一齊合作，從新研究Burbn。經過幾番分析同修改後，兩人最後決定放棄大部分功能，只專注影相一環，將其發揚光大，之後再改名從新包裝推出，變成今日大家熟識嘅Instagram。

Mike Krieger （左），Kevin Systrom （右）

　　由最初Burbn到今日嘅Instagram，期間產品大大少少嘅修改不計其數，中段亦試過返轉頭由Burbn嘅初型重新策劃，就算到咗今日，Instagram每隔一段時間都有新update，除咗要修正問題之外，仲要為咗班奄尖怕悶嘅大眾用戶製造新驚喜，為產品製造長線價值。

　　產品或者服務會因為時代嘅變遷而令其變得不完美，強如Facebook、Google等每日都有不同嘅修正。幫自己產品推至完美境界係一件好事，但如果用好長時間搞一大餐後，變相令產品變得過時，創業可能就此敗北。所以創業者盡量要平衡呢一點，如果可以的話，最好保留產品有「更新」嘅空間，令自己更易捉緊創業嘅節奏。

　　創業好講求天時地利人和嘅配合，有時「東風」一到，但產品未得，都可能要硬著頭皮出住先。與其盲目地追求完美嘅產品，倒不如追求完美嘅「平衡」，把握一個最好嘅創業時機～【創業的通病（三）】

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情