【Office=監倉？】掃走Monday Blue！三招增強員工歸屬感

　　黃子華其中一句好深入民心嘅金句「一份好工，就係要令你唔怕星期一」，公司要令同事唔怕星期一其實唔難？其實好難！工作內容其一，工作環境其二。工作內容好難改變，除咗關係到你嘅職位同職級，亦視乎老細/上司嘅工作style。另一方面，每個同事對老細嘅感覺都好主觀，唔同同事對住同一位老細，都有唔同嘅感覺。但工作環境就較為客觀，配套、同事、環境等都能夠為員工帶來一種無形嘅張力，令人工極低嘅同事都會有想返工嘅歸屬感。

 

 

「配套」

 

　　好多公司各方面嘅配套永遠都係 「限量版」，廁紙限量派，冇pantry 冇茶包冇餐具，文具亦只會喺第一日返工時派一次，之後如有需要，就要填十張form再等一個月先有一支新原子筆用，感覺寒酸，試問邊會有員工鍾意喺一間「幾格廁紙都同你計」嘅公司工作呢？雖然大部分人覺得，提供免費茶包廁紙只係作為一間正常公司嘅基本，不過永遠都會有老細覺得「唔值」。

 

　　其實左計右計啲廁紙，最後慳返果幾十蚊，但就換來同事生厭，公司名聲受損，又何必呢？相反，有公司喺呢一部分會花費較多，基本配套不在話下，另外仲有免費咖啡小食，定期有咖啡師到公司拉花，有按摩技師去每位同事座位度按摩，亦會為同事訂造電腦椅等等。可能呢一刻錢係洗多咗，但因為咁而減低員工流失率，變相慳返好多行政費，亦增加同事對公司嘅歸屬感。

 

「同事」

 

　　不論人工有幾高，有時都不及有一班好同事同你一齊打拼咁高興，因為人工再高，你只會喺月頭出糧果兩日先開心，但好同事就能給你有一種「安慰」同生存意識。除此之外，每間公司總有幾位開心笑蛋或者爛gag王同事，佢哋未必喺工作幫到你手，但佢哋獨特嘅氣場總能夠緩和嚴肅而緊張嘅場合，使工作突然變得順利。見過有公司會因為同事有呢種氣場，就算佢哋工作能力麻麻，都唔會炒佢，甚至畀市價為高嘅人工留低佢哋，可見有時公司嘅工作氣氛更勝一切。

 

「環境」

 

　　Partition 其實係一個可愛又可恨嘅東西，如果partition夠大，可以為大家創造更多私人空間，方便淘寶、做自己野；但同時間亦會令公司靜過圖書館，同事間全冇人情味，各有各做，感覺全公司好似得自己一個人，真係死咗都冇人知。

 

　　其實多數公司會因應工作性質同行業，而決定有冇partition。近年嘅初創公司，或者創意成分較重嘅公司多數都會棄用partition，能夠增加空間感嘅同時亦方便工作上溝通。雖然好難評論有partition好啲、定冇partition好啲，但外國就有公司會畀同事自己選擇座位裝唔裝partition，或者就算一定要partition，都唔裝太高嘅partition，令公司變成「semi partition」。減少partition可以增加非工作上人與人之間嘅溝通，眼神交流、「過界」、偷聽、插咀等，都係同事間微妙嘅互動，令員工多一個返工嘅原因。

 

　　老細要為公司創造盈利之外，亦要為同事創造辦公室嘅回憶，唔應該為咗慳少少錢，而將辦公室變成一個打工仔嘅監倉。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票