《Make Money》在家工作都可賺外快？Click兩個掣就搞掂！

 　　疫情反彈下，相信唔少公司又開始搞WFH（在家工作），對於工作點同屋企有一段距離嘅打工仔梗係爽歪歪！不過在家工作變相自由度大咗，騰空好多時間出嚟。今集《Make Money》教大家點樣家中 Click兩個掣就賺外快！

 

 

填問卷，拎禮券，賺積分！

　　

　　其實習慣賺開網絡錢嘅人都知道呢種搵外快方式，情況就好似調查公司搵人去做聚焦小組咁，大家一齊講吓件產品有咩好、有咩唔好，分析吓用後感之類；網絡問卷情況都類似，例如網站「opinionworld」咁，只要你註冊之後，參與網上調查、測試新產品，睇睇佢啲廣告，之後寫個報告或者填問卷，之後佢就會回贈返啲積分畀你。

 

　　你就可以用佢啲積分，愛嚟換返一啲咖啡現金券、食物現金券、甚至服裝現金券都有！不過你唔想要現金券的話，其實都可以回贈返現金畀你，不過你就要開返一個Paypal戶口，連結返自己銀行，手續有小小煩。

 

線上對話可賺多啲，但關鍵係你要識英文

 

 

　　類似嘅線上問卷網站真係好多，但調查公司為咗深入咁了解某種行業或產品嘅資訊，佢地都會做一種「線上對話問答」，例如網站「User Testing」咁，佢就有唔同類型嘅線上問答總類，只要搵返自己熟悉嘅資訊進行回答，回報可以高達每次60美金（約468港元）。

 

　　不過留意返，呢啲畢竟係國際網站，訪問員可能係操英文人士，甚至有時未必有純正口音，筆者都曾經試過呢類對話，遇到一個烏克蘭國藉嘅操英文女士，口音甚有「歐洲風味」，每次問答都好似做英文聆聽咁，所以想賺呢種錢就可能要加強自己英文聆聽能力啦！

 

上載收據都可賺錢，一部手機就可做到！

 

 

　　呢幾年個個都講「大數據」、「物聯網」，只要掌握人們嘅消費習慣，就可以令到產品銷售提升，但究竟呢種數據可以係邊度收集呢？過往都係公司搵人做調查報告，但晒時間又要耗資一定程度。不過而家就唔使咁煩啦！有公司開啟一種「收集票據」方式，只要你上載你每日買嘢收據到App入面，佢地就會有積分回贈畀你，同樣都係夠一定程度分數，佢地會回贈禮物卡之類嘅禮品，甚至可以回贈現金。

 

　　不過後生一輩成日都覺得買嘢拎單好煩，所以想要賺呢種回贈係必須有「師奶仔」心態先可成事，唔知你又會唔會做到呢？

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情