《經濟不停學》香港點解有三間發鈔行？港元與聯匯嘅前世今生！

　　香港嘅銀紙樣色真係夠晒多，好似隔幾年就會出唔同樣，設計好唔好睇係其次，問題係難適應呀嘛！認顏色都好啲，香港三間發鈔行鍾意出唔同圖案，又蝴蝶又粵劇咁，買嘢畀錯錢就尷尬啦。其實，唔計政府出嘅十蚊紙，香港有三間發鈔行，背後當然離唔開政治同經濟，而聯匯制度就喺維持匯率穩定方面，擔當咗重要嘅角色。

 

（Unsplash圖片）

 

發鈔行：英資匯豐及渣打 中資中銀

 

　　同其他國家及地區好唔同，香港無中央銀行，所以發鈔嘅責任主要落咗喺三間發鈔行，分別係匯豐、渣打同中銀，但其實一開始香江嘅發鈔安排並唔係咁。

 

　　喺1841年港島成為英國殖民地，而第一張港幣，係由一間總部設喺印度，名叫東藩匯理銀行喺1846年發行嘅。不過之後匯豐掘起，東藩匯理嘅生意就愈嚟愈頹，後尾因為借咗好多錢畀錫蘭嘅咖啡農業，但偏偏咖啡失收令佢間接陷入財困，香港第一間發鈔行就咁無咗啦。

 

　　政府果陣對紙幣發行無乜監管，加埋１９世紀嘅金融危機席捲全球，好多銀行執笠，社會都幾混亂。之後政府終於頂唔順，公布用「港元」做香港貨幣單位，而三間發鈔行發行嘅紙幣首次被指定為法定貨幣，分別係印度倫頓中國三處匯理銀行（其後改名做有利銀行）、印度新金山匯理中國銀行，同埋屬於英資嘅香港上海匯豐銀行。

 

 

　　之後有利銀行畀匯豐收購咗，而印度新金山匯理中國銀行同英屬南非標準銀行合併，改名做渣打。

 

　　至於中銀點解會做到發鈔行嘅原因有啲玄妙，有人話中銀化解咗80年代嘅港元匯價危機、銀行擠提事件等，地位直線上升。亦有人話因為「97」將至，英資退、中資上，背後離唔開政治角力。亦可能兩樣原因都有，總之喺1993年，香江立法局承認中銀香港分行發鈔嘅合法性，第二年中銀就正式發行港幣。

 

港元穩定非必然 要多謝聯匯制度

　　講開貨幣話題，真係要提下聯繫匯率制度。其實喺東藩匯理銀行發行第一張「大棉胎」五蚊紙嘅時候，係作為存放白銀喺銀行嘅票據，隨時可以兌換做相同面值嘅白銀。不過咁唔代表港元係同白銀掛鈎，而事實上當時同港元掛勾緊嘅係英鎊。

 

　　因為香港唔係主權國家，所以同港元掛勾嘅貨幣（發行嘅國家）或者實物，一定要夠穩陣，先可以帶畀市場信心。後尾英國經濟差咗，港元匯價自由浮動過一排，到1980年代初，香港出現前途問題同埋股災，港紙係咁貶值呀，於是香港政府決定喺1983年公布同美元掛勾嘅聯繫匯率制度，自此實行到依家。

 

（資料圖片）

 

　　聯繫匯率對於港幣嘅影響在於，三間發鈔行要發行港元，每發7.8港元就要畀1美元政府，所以三間行發行嘅港紙現鈔，原則上係可以完全兌換成美元。而金管局提供兌換保證，承諾喺7.75港元兌1美元嘅強方兌換保證水平，按銀行要求沽港元，並喺7.85港元兌1美元嘅弱方兌換保證水平，按銀行要求買入港元。大家近排會成日見到港元觸及強方兌換保證，金管局要承接美元沽盤嘅新聞，就係因為港紙強勢，金管局維持聯匯制度啦!

 

撰文：吳藹林

 

 

 

 

 

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇