《Online有話兒》中信里昂風水報告出爐，金旺土弱地產危危乎？

　　又嚟過年啦，相信大家係鼠年都應該好難捱啦？送鼠迎牛，一年一度中信里昂風水報告又出爐啦！中國人最睇重風水流年運程，來年就係辛丑來，五行屬於土金，不過風水師就話土弱金旺，今年股市應該繼續GOGOGO啦！不過可能地產就慘小小啦！

今年份報告都夠晒「牛」（中信里昂報告）

牛屬土但力量弱，財位係新蒲崗同青衣？

(Shutterstock圖片)

　　今年牛年五行屬土金，但據報告內風水師所講，今年雖然屬土，但能力被用於「止水生金」，所以建築行業只能「勉強度日」，唔通今年地產都係危危乎？不過佢又話，隨住下半年木運減弱，所以寶石、皮革類領域都有改善，咁唔知地產股下半年會唔會好小小呢？

　　另外，風水師又指，恒指屬「土雞」，對應今年隻「金牛」，八字可以和諧相處，牛年股市應該更加穩定！牛年係2月3日起開始轉運，投資者可能忍忍手等多幾日啦！

九龍係財位，多Ｄ去行下先得！（中信里昂報告）

　　至於今年財位係邊呢？報告以「九宮飛星圖」方式，將香港分開九格，由於今年正財位係正中，即有「武曲星」坐鎮，按照個分區就係新蒲崗及青衣，所以如果係呢一佢投資者房地產可能會有唔錯表現！而西北就係破財「破軍星」，唔通大西北樓價會回調咁正？想上車就機會來啦！

金水力量強，下半年股市會有唔錯表現

(Shutterstock圖片)

　　今年金運全年都會係水嘅力量底下貫穿，但由於春末至夏末火運加強，屬性火克金關係，所以上半年股市未必有咁好表現；但隨住中秋節後火運減弱，金運又重回良好狀態，相信好多衝突都會解決，預計銀行同其他金融機構都會賺到笑！

　　至於水運係今年都好似幾唔錯，同水相關嘅行業，係春季至秋末表現最好！意味旅遊、交通、物流、航運同貿易都會可以有機會反彈啦！而屬木嘅醫藥、製衣行業，就會係夏初先開始有轉機；屬火嘅石油、電信類股份就今年表現麻麻，要可能等到下年新有轉變！

７月或「牛氣最旺」，到１０月可能見底

(Shutterstock圖片)

　　至於今年股市點行呢？據報告所講，呢隻「牛」係今年頭幾個月都係運程麻麻，直到六月尾先開始轉運，而七月至八月更係股市高峰！不過高峰過後就會迎來「牛仰馬翻」，然後跌到落去１１月先開始有機會再反彈，要買貨投資者可能要多加留意啦！

　　至於風水命理就並唔係科學，只係畀人用作參考，買股票最緊要就係憑自己專業知識，同埋眼光獨到先可以成事！新一年就祝大家賺到賺到飛起，繼續「牛氣沖天」啦！

撰文：李皆穎

《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇