2021-02-23
《Online有話兒》耶倫同比爾蓋茨齊齊唱淡比特幣，衰在唔環保、高投機
隨著比特幣頻頻破頂，再加埋特斯拉（美：TSLA）執行長馬斯克喺推特上面出post發功唱好比特幣，又將部分資產轉做比特幣，有好多投資者跟機入場。不過比特幣嘅波動性仍然好大，噚晚一度喺5分鐘內跌咗3000美金。呢個議題就引起美國財長耶倫同微軟聯合創始人比爾蓋茨嘅興趣，而今次唔係唱好，而係唱淡喎。
耶倫首次暗示支持儲局研究數字美金
(shutterstock圖片)
耶倫話，佢唔認為比特幣依家被廣泛用作交易機制。數字貨幣或者可能係更快、更低成本嘅支付方式，但有好多問題需要研究，包括消費者保障、洗黑錢咁。比特幣經常被用於非法融資，效率低下。佢形容：
「用比特幣交易係一種極其低效嘅方式，處理呢啲交易所消耗嘅能源驚人，而且仲係一種高度投機嘅資產。」
講完比特幣啲衰嘢之後，就開始話由美聯儲研究數字美元貨幣會更有意義，由美聯儲維持並基於區塊鏈的數字美元可能會係更快、更安全同更平嘅付款方式喎。
呢次係美國財政部首度公開暗示支持美聯儲研究數字美金。而聯儲局所透露嘅訊息，依家研究緊中央銀行數字貨幣（central bank digital currency），美聯儲理事會有一個技術實驗室，構建同測試緊一系列分布式平台，以了解潛在收益同風險。對於政府嚟講，自行研發嘅虛擬貨幣可控性理應更高，都唔怪得耶倫會咁講。
比爾蓋茨：冇錢唔好學人玩比特幣
(shutterstock圖片)
至於比爾蓋茨果然係商家佬，由投資角度講投資比特幣有咩風險。佢率先表明自己唔係比特幣嘅支持者，認為開採會消耗大量能源，影響環境。佢仲為馬斯克以外嘅投資者感到擔心：
「馬斯克好有錢，佢投資經驗老到，所以我不擔心佢嘅盤口出現問題。但我認為高位買入嘅人，佢哋冇咁多閒錢去抵受風險，所以我唔睇好比特幣。」
「總括嚟講，如果你冇馬斯克咁多錢，你都係應該小心啲。」
咁又係呀，馬斯克依家喺世界富豪榜第二名，身家有1830億美金，僅次於亞馬遜現任董事長兼CEO貝索斯，一早已經財務自由，少咁幾億有咩所謂，普通人就唔同啦。
撰文：吳藹林
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇
