《Online有話兒》耶倫話有工具對付通脹，對沖基金認為短期債息穩定，科技股唔通有運行？

　　美國1﹒9萬億美元紓困方案仲等緊眾議院表決，同時美國十年期國債孳息率係咁升，噚晚更高見1﹒61厘，睇嚟唔少投資者驚通脹升溫。聯儲局主席鮑威爾又無乜行動，搞到香港啲科技股波幅勁大呀。今次到美國財長耶倫出聲，話預計紓困方案唔會令物價急飆，若果通脹真係出現，都有工具可以應對。另外，亦有對沖基金創辦人話國債投資者可能已經掟完貨，叫人入市。

 

耶倫：債息升唔係因為通脹，係美國經濟好呀！

（Shutterstock圖片）

 

　　耶倫受訪話，佢真係唔覺得刺激計劃會帶來令人擔憂嘅通脹，正係有刺激計劃先可以令美國喺出年重返疫情前經濟水平同恢復充分就業。而且就算通脹率走高亦有工具來應對。佢之前仲講：

　

　「國債收益率上升唔係因為通脹失控，而係經濟表現超出預期。」

 

　　佢話，美國出現緊K型復甦，意思即係不斷放水搞到資產價格急漲，但就業市場復甦速度跟唔上，有機會造成貧富差距擴大。耶倫認為依家形勢更差，美國政府已經著手研究緊下一個計劃，針對不平等嘅經濟基本問題。

 

泰珀、連登契媽繼續睇好美股

（Shutterstock圖片）

 

　　對沖基金阿帕盧薩資產管理（Appaloosa Management）創辦人、華爾街知名「撈底王」泰珀就認為，市場嘅主要風險已經消除，國債投資者可能已經掟完貨，短期內利率會更加穩定，依家入市仲安全。而且多年嚟一直係美債淨賣家嘅日本可能會喺收益率飆升後再次買美債，亦有助穩定債券市場。

 

　　泰珀仲話，美股回調之後好似亞馬遜（美：AMZN）呢類「領頭羊」開始顯得有吸引力，唔知佢撈咗底未呢？事實上，唱好美股嘅人唔止佢一個，「連登契媽」Cathie Wood旗下的Ark Investment　嘅創新ETF（ARKK）由近期高位已經下跌超過三成，契媽話唔擔心佢嘅基金最近有回調，只係因為更多價值型股票或者周期性行業嘅股份踏入牛市。

 

「依家嘅情況對公司嘅長期戰略嚟講係非常好。最怕係科技同電訊泡沫，到果陣市場會收窄，得返好少股份有得升。」

 

　　泰珀同契媽都係靠投資搵飯食，佢哋嘅意見大家咪當做參考下，耶倫亦都有政府立場。近排都見到有資金撈緊新經濟股，總之波動市大家小心為上。

 

撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情