書展女子愛雜誌 男子捧Mark哥 眾志冇人理

　　書展今日開鑼，身為半個「文青」Jenny就緊係一早排隊入場，吸收下書展嘅正氣。唔好成日話香港人掛住搵錢，其實唔少人都好喜歡睇書! 書展未開幕已經有市民一早嚟到排隊，佢地心中明顯都已經有曬打算，睇定曬目標，一開門就各就各位，直撲去目標攤位。

一開閘嘅時候，杜生就一枝箭「標」出去！係愛呀！哈利！

女子組愛雜誌

　　首先睇下女子組嘅目標，開幕唔夠十分鐘，就已經有一檔排起長龍，細心一望，條隊裹邊全部都係妙齡女子。原來係排緊訂閱雜誌嘅攤位。你都咪話啲禮品唔吸引呀，份份都要係名牌，只要訂一年雜誌，就可以左手右手拎滿禮品，滿載而歸。不過呢，其實呢個係書展，唔係化妝品護膚品展喎，一眾姐姐妹妹就會唔會有啲錯focus呢?咁雜誌都係書嘅一種，你話大家都算係閱覽群書，Jenny都冇異議嘅~

男子組捧Mark哥

　　來到男子組呢面，開展唔夠五分鐘，Jenny就見到有一攤檔被一群大漢團團圍住，原來係買緊電影《英雄本色》嘅畫集。果然每個男人心入邊都有個Mark哥。《英雄本色》不愧為港產片嘅經典，呢本畫集可以詬話勾起一整代人嘅青春回憶，真係唔買都要睇吓!

　　不過，大家都唔好太過性別定型，男人除咗鍾意睇《英雄本色》，都可以鍾意愛情小說嘅!講緊係年年都排頭位嘅杜先生呀!今年佢都唔例外，早一日就排隊入場，要搶偶像林詠琛寫嘅新書《寂寞遊戲》。Jenny望住杜先生為愛奔跑嘅腳步，就深深明白「少女心」，係不分性別、種族同年齡。如果小妹係林詠琛，真係要講句:「人生得一書迷如此，夫復何求!」

　　講開又講，聽聞網民要去三中商攤位示威，所以Jenny目標本來係三中商攤位等示威者，但等咗成個上晝就唔見有人到。直至晚上先見眾志成員出現，不過得一個人舉牌，人丁又單薄咗啲囉!

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇