好耐冇見呀陳生！乜又係你呀？今次終於有好消息喇？

　　曾經拍住上嘅運房局陳帆（帆哥）同保安局局長李家超，而家只係淨返李家超仍然處於風暴嘅中心，陳帆早就脫風暴，作璧上觀。咁耐無見，今日帆哥佢就出返嚟，講返個大家都開始唔記得嘅嘢，就係沙中線喇！嗱！之前次次帆哥一講沙中線實冇好嘢，但今日都叫有個好消息帶畀大家，就係沙中線可以局部通車！

昔日嘅戰友 今日嘅花生友

　　心水清嘅讀者應該都記得，上年沙中線同一地兩檢呢兩個炸彈令到帆哥加埋李局長十對手都拆唔掂，三日唔埋兩日又要出嚟交代，Jenny同一眾行家見佢可能仲多過見老細！仲記得「三合一」記者會入面，帆哥同李局長排排坐，齊齊畀記者質詢。

　　不過，帆哥近月就領悟到佛系做官嘅道理，安安靜靜不炒不鬧，一於企風暴嘅外邊，默默守護其他問責高官同事，冇乜事都唔會輕易出聲。你問Jenny幾耐冇見過帆哥？Jenny數呀數，都數唔到印象中上次見佢係幾時嘅事呀！

朋友你試過將我營救～

　　Jenny一直都覺得份工好唔好做，同班同事都好有關係。帆哥做官嘅時勢唔算最好，不過就一定揀啱咗班好同事。正所謂當有一個污點出現咗，如果有一個更大嘅污點去掩蓋，就即刻No Problem啦。在《逃犯條例》修訂風波底下，真係咩事都可以大事化小，小事化無呀。

　　如果Jenny係帆哥，都真係要多謝好同事李局長用心良苦，願意拋個身出嚟墊住，做民望尾二嘅局長，叫好過律政司司長鄭若驊少少咁啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》說說心理急救：遇危急事故應如何面對？點樣正確提供情緒支援？講錯說話容易造成二次傷害！► 即睇