政府「失冊」查完樣樣都唔知　想縮投票時間因為唔想OT?

　　今日選管會主席馮驊(馮官)出嚟見記者，交代一下暪足香港人兩年嘅消失的選民登記冊事件。嗱!調查報告有就有喇，但…..Jenny睇完忍唔住要講句:「法官大人，我無嘢講!」

 

 

消失的登記冊

 

　　從前，有9本選民登記冊「離家出走」，如果唔係廉署想拎來睇睇，選舉事務處都唔知佢地唔見咗呀!搵呀搵、摷呀摷，終於喺一堆物資入面搵返7本，然後有本好曳曳，匿埋咗喺堆選票入面。咁仲有1本呢?

 

　　Sorry喇! 搵唔返喎!馮官話，唔知幾時唔見、唔知點樣唔見、唔知點解唔見…..Jenny睇住份成吋厚嘅報告，逐頁逐頁睇，因乜解究做完成個調查，都係乜都唔知呢?

 

　　選管會話，搵唔返本選民登記冊嘅係因為包裝、檢查、回收、運送、貯存同提取都有做得唔好嘅地方……等等等等，咁講嘅話，借問呀馮官，其實有邊度係做得好㗎?唔知!

 

選舉事務處都要面對土地問題

 

　　可憐嘅係，因為土地問題，選舉事務處嘅文件同物資都係「遊牧民族」呀，啲倉成日要搬黎搬去，一時又要寄人籬下，一時又被逼遷，估唔到，喺香港連選票都要面對住屋問題呀！慘豬!

 

　　不過，終於有一樣我哋係知嘅，就係有人講．大．話!有人話佢唔知，其實係一早就知，咪就係前總選舉事務主任黃思文囉!佢喺4月個記者會度表演「卸膊操」，大大聲話班細嘅冇同佢講過喎，不過調查完就俾人踢爆咗原來事實並唔係咁!

 

唔想OT可以點?

 

　　唉!我哋知道有人講大話又點，佢之後唔唔會受罰呢？都係嗰句:唔知呀。馮官就同Jenny講，因為呢個係調查權限之外嘅事。Jenny唯有去問政制及內地事務局聶局長，佢話黃思文6月下旬起已經放假，今日起就正式調離選舉事務處，至於仲有幾多人涉及事件?查下先喎!即係又唔知啦!

 

　　報告就提咗一大串改善措施，當中有項就話要考慮下縮短投票時間，What?!Jenny望真啲，原來係話因為投票站啲工作人員連做30個鐘好辛苦？打工仔唔想OT，Jenny明!真係明!但係兩更制又點解唔得呢?馮官話，好難請人呀!其實有幾難呢?出得起錢，請兩、三個月嘅臨時工應該唔係問題，又或者問其他部門做短暫借調，有冇得諗?香港人，優點係識變通嘛!

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好