「我宣佈，港珠澳大橋開通！」

　　習主席一聲令下，標誌住21世紀中國其中一項最偉大嘅工程項目－港珠澳大橋正式揭幕。台下嘅社會賢達，個個都熱淚盈眶、心情悸動，無不想衝上去攬住習大大講返句：「厲害了我的國！」

　　當然，最終呢班社會賢達梗係唔會咁做，因為社會賢達都係有身份有地位嘅人，但Tina可以話畀大家知，為咗爭取見到習主席，呢班社會賢達又真係表現得無乜身份、無乜地位。

　　話說上星期四，率先爆出有「部分」立法會建制派議員已經收到由運房局發出嘅邀請電郵。呢「部分」真係稱得上係少得可憐，咁其他同屬建制而又收唔到邀請嘅議員，個個都開始心慌慌，驚住無得去「面聖」。

　　去到星期五，仲未收到邀請嘅議員緊張萬分，個個第一時間當然係打電話去運房局問下幾時寄出邀請，據聞運房局當時就將個波推畀阿爺，話成個儀式都係阿爺負責，香港呢邊都只係執行者。 

　　政府一放出呢句說話，西環個邊個電話仲響得密過東華三院條捐款熱線，有西環官員更加畀同位議員「On Call 36小時」，由星期五Call到星期六。最無辜嘅係，西環只係有份負責開通儀式嘅安排，但對於港方獲邀名單，佢地早早就已經交畀香港政府去負責制訂，等阿爺過目，由始至終畀香港政府嘅Order只係得一個，就係要確保到儀式喺無任何干擾嘅情況下順順利利舉行，所以西環並無決定邊個去得邊個唔去得，可算係食咗一隻死貓。

　　不過西環仍然肯去回應部分議員嘅訴求，據聞星期六施展追魂Call搵香港政府拆掂佢，並容許政府加人入最後嘅出席名單。但有西環人就私下同Tina透露，今次事件對爭位議員真係改觀晒，話班尊貴議員咁辛苦爭個位返來，去到儀式根本連習主席方圓10米都行唔到入去，連問句好都問唔到，更加唔使旨意習主席知道邊個喺度邊個唔喺度，爭崩頭為乜呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】東南亞藝術市場是下一個熱點？一探各地獨特及吸引之處！► 即睇