一到選舉年，政治人物自必然動作多多，而踏入豬年，第一個「衝豬」嘅估唔到就係新民黨主席葉劉淑儀。葉劉無神神掟出一個私人條例草案，建議修例為原為房委會旗下、已出售或轉售嘅商場、車位等物業引入租金增幅管制、空置稅及現有租戶優先續租權，正式喺人日之前將一份大禮送畀譽為「香港大山」嘅領展。

　　議員嘅私人條例草案，先唔好諗過唔過到立法會嘅分組點票，第一步首先係要得到葉劉「妹妹」林鄭月娥嘅首肯，條例先可以掟去立法會討論同投票。咁「妹妹」又有咩點要考慮？首先，香港一向係最自由嘅經濟體，喺香港營商，無論係中資外資本地資，大家都人人平等，無乜政策嘅干預，呢個係香港賴以成功嘅基石；葉劉呢個條例草案，只係針對領展旗下嘅物業，擺到明就係一下鑿爛呢個基石，Tina相信無論林鄭有幾唔鍾意領展，都犯不著要為「姐姐」抬轎，估計呢個草案連去到立法會嘅機會都偏低。

　　既然係咁，作為行政會議成員之一嘅葉劉又為乜要搞場大龍鳳？有政圈中人就分析，今次葉劉單挑領展大山，無論成唔成功，都必然俘虜全港十八區公屋嘅心，全港民望大幅飆升，唔再只係做中產票后；而咁樣最大嘅好處係爭取到籌碼畀葉劉明年出戰超級區議會嘅界別去拎立法會入場券，而港島嘅席位就可以交捧畀返上次補選輸咗嘅陳家珮，所以條例草案成敗與否唔仲要，真係項莊舞劍，意在沛公。

　　呢個亦都解釋到點解葉劉只係搵到工聯會麥美娟而搵唔到民建聯一齊撐呢個條例草案，事關民建聯李慧琼同埋周浩鼎上屆拎左兩席超區，如果葉劉嚟緊呢一屆又真係埋位搶一席的話，周浩鼎一齊選而又選到嘅機會自必然大大降低，最後可能會走返去新西出選，又影響到同區黨友嘅布置。所以話嚟緊睇民建聯點樣回應葉劉呢個條例草案（又唔可以抬轎、又唔可以得失公屋選民）就係最過癮嘅新年節目喇！

　　最後恭祝各位經濟通讀者豬年豬籠入水、珠光寶氣！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。