當有人讚你嘅時候，你應該點樣回應？

　　職場上受到別人嘅讚賞當然值得開心。但面對面接受別人讚賞嘅時候，點樣回應先至算係恰當？點樣先可以做到又有禮貌，而又唔會過分謙卑？

 

 

大部分人面對讚賞，大致上可以分為三種回應：

一、欣然接受

二、拒絕讚賞

三、避重就輕

 

　　頭兩個選擇比較極端，因為欣然接受會畀人覺得你過份自大，拒絕讚賞亦會令人覺得你「唔識做人」，令人感覺不是味兒。所以大部分人都會選取中庸之道，即係避重就輕咁回應。以下係一啲接受讚美嘅常用方式及建議： 

 

學懂轉移視線

 

　　你可以嘗試將讚美重點從你自己，轉移到其他地方，例如有人讚你「今次活動搞得好成功，good job！」你可以嘗試回應：「多謝！不過都要多得成條team嘅分工合作，先會有今日嘅成果。」又或者有人讚你「今日著得好靚仔喎！」你可以嘗試回應：「多謝！不過主要都係因為呢套黑色西裝，令我睇起嚟好似瘦啲啫。」

 

　　轉移視線呢個方法喺你禮貌地接受讚美之後，嘗試「稀釋」之後嘅尷尬氣氛，用一個半講笑，半認真嘅方式輕輕帶過。

 

請勿怕醜

 

　　當你聽到別人對你嘅讚美，簡單一句「多謝」其實已經非常恰當。千祈唔好因為唔知畀乜嘢反應，而假扮聽唔到，因為咁樣可能會令讚美者覺得你「寸」而扮聽唔到，或者佢會以為自己講得太細聲，而重複讚美你嘅說話，最終令情況更加尷尬。

 

無謂說話可免則免

 

　　有啲人可能想展示佢謙虛嘅一面，所以喺聽到別人讚美之後，會出盡力咁樣踩自己，又或者講一啲對自己嘅負面評價。咁做不單止冇令讚美者或身邊嘅人覺得你謙虛，反而你講嘅負面評語會同別人講嘅讚美說話形成對比，變相否定別人嘅說話，令人感覺「冇癮」。

 

講完多謝後的Dead Air

 

　　好多人會擔心講咗一句「多謝」之後會出現dead air，唔知應該點樣應付。如果對方冇提出後續問題，或者補充說話，你可以嘗試根據頭先嘅讚美內容，分享一啲你自己嘅個人感受。例如大老細讚你個計劃書寫得非常好，你回應一句「多謝」之後，你可以嘗試分享籌備計劃書嘅經歷、做資料搜習嘅過程等等，將話題焦點自然地從你自己轉移到其他事項身上。

 

　　受到別人讚賞當然係好事，但如果你嘅反應奇怪或過於極端，亦難免令人喺你嘅印象上留下污點。以上幾個重點希望可以讓你做到「謙虛但不失自信，有禮貌而不失個性」。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動