投身飲食業必睇！ 餐廳marketing四大失敗原因

　　早前有外國學者統計，每年大約有30%餐廳倒閉或者轉讓，而當踏入經濟回落周期嘅時候，情況更為嚴重，除咗因為大眾少咗俾錢出街食飯之外，昂貴嘅租金亦係另一個致命傷。雖然係咁，每年都會有好多創業者投身飲食業，自資開餐廳做老闆，大大小小嘅餐廳、方便飲、小食店開到成巷成市。如果你都準備投身呢個行業的話，以下嘅失敗通病就不能不知，並要記得避開！ 

 

 

1、家庭生意、管理不善

 

　　如果大家暑期工有做過餐廳就會知道，好多餐廳嘅樓面同廚房完全係兩個世界、兩個幫派，完全係兩個管理嘅手法。因為大多老細都未必係學廚出生，唔太了解廚房同事嘅工作同文化，所以佢哋都係只懂管理樓面，間唔中就會有「大細超」嘅情況出現。而且相比之下廚房員工唔似得樓面員工咁「口才了得」，廚房員工大多詞不達意，有嗰句講嗰句，經常同老細或者樓面同事產生溝通上問題。

 

　　另一方面，好多餐廳都係「家庭生意」，講嘅唔係一代轉一代嗰隻「家族生意」。家庭生意──意思係成個餐廳都係一家人，媽咪老豆阿姨阿叔全家到齊，細佬家姐星期六日都會客串一下，不過「家庭員工」九成係「生手」，令問題更加嚴重，如是者，每隔幾個月就會有一批掌管餐廳生死嘅廚房師父辭職，令餐廳未能保持水準。生手員工亦會令樓面產生混亂，到最後留唔住客人亦留唔倒好員工。

 

2、抄抄抄

 

　　喺香港，只要有一間餐廳／食肆做得好，過兩、三個月市面就會出現好多分身。好似韓式燒肉、台式方便飲品、自創雞蛋仔等就係好好嘅例子，有啲連店舖名稱都可以照抄66%（即係個名得三粒字，佢抄咗兩粒字）。明顯地呢啲餐廳開業時根本就冇考慮過marketing嘅問題，如公司嘅定位、產品特色、地區性競爭、目標客戶取向等，完全冇計劃過，一心只係想借他人名氣，順住潮流「走一轉」。其實「抄」真係冇乜問題，只要抄得其所，集各家大成，再加返自己嘅特色，係絕對可以嘅。但如果你係全無特色的話，咁樣競爭力往往不及其他對手，結果只有頭一兩年有錢賺（可能一年都冇～），然後損手離場。

 

3、只懂減價

 

　　同大部份公司一樣，當遇到生意唔好嘅時候，老細唔理三七二十一，第一件事必定係做減價優惠救市。打紅海策略對所有老細嚟講無疑係最簡單直接嘅方法，但未必係最好嘅方法。經營一間餐廳，唔計一啲超大集團同特別例子，平均嚟計，當中40-65%錢錢用咗喺食材同舖租成本（視乎店舖大少）、25%係人工、10%係雜費，之後平均利潤為5-35%（亦有數據指，餐飲業平均利潤為5-15%，15%已經係好好）。即係每一次打減價戰做八折、九折優惠，你嘅利潤就即刻降至0-15%，一下唔好彩嗰個月食材成本上升，就即刻變咗白做，所以速銷並唔可以長線策略。生意唔好嘅時候，老細唔懂得分析根源問題，永遠覺得冇人幫襯係因為受近期市況影響，速銷一兩個月就會冇事，最終速銷賺少咗嘅同時，亦冇解決到問題，繼續蝕錢。

 

 

4、永不言敗

 

　　你無聽錯「努力不懈、永不言敗」都可能係致命原因，永不言敗有時未必乜野情況都適用，做生意係好現實，數字反映一切，冇生意就係冇生意，想盡辦法都解決唔倒問題就係解決唔倒。見過好多老細其實一早已經發現問題，但可惜有心無力，就係因為唔肯認輸，眼看生意由賺變蝕。成日講，一盤成功嘅生意唔一定要好長久，長久嘅生意亦唔一定代表成功，所以如果你開餐廳能夠喺短時間賺一轉，之後結業成功脫身，都可以係好成功嘅例子。

 

　　餐飲業係一個競爭大、風險高、投資大嘅行業，要成功係並唔係易事。做任何一個行業都好，賺幾多錢唔係最重要，最後能夠守住幾多錢先係重點。 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票