【Online有話兒】埃爾多安兩年炒三任央行行長，里拉暴跌有乜因由？

　　今日環球股市波動，其中一個原因就係因為土耳其總統埃爾多安再炒央行行長Naci Agbal（阿巴爾），間接令到里拉今日大跌一成七，究竟有乜原因令到埃爾多安兩年炒三任行長咁霸氣呢？而里拉大跌背後原來係國際貨幣之間對決！

 

　

（Shutterstock圖片)

 

阿巴爾被炒，因為加息太高？

 

　　據了解，呢次「里拉插水」事件，係因為3月18日，土耳其央行宣布將基準利率由17％提高至19％，不過埃爾多安從來都唔係高息主義者，並曾經表示：

 

　　「高利率並不會令國家得到發展。」

 

　　說時遲那時快，係3月20日埃爾多安就透過官方宣布，將會任命卡夫哲奧盧為新任央行行長，將阿巴爾炒魷魚！呢位新行長畢業於土耳其伊茲密爾九月九大學，並係馬爾馬拉大學取得碩士及博士學位，被任命為行長之前係土耳其人民銀行任職。佢上周都剛剛撰文指，選擇加息並不能解決經濟問題。

 

加息對抗通脹上升，巴西俄羅斯齊齊加！

 

（Shutterstock圖片)

 

　　其實阿巴爾都只係僅僅上任四個幾月，就已經將當地基準利率上升875個基點，有分析認為，提高利率可以壓制通貨膨脹同埋對抗貨幣貶值，而今年2月土耳其通脹已經逼近16％。

 

　　背後原因，正正係美國國債孳息率大幅抽升，令到一啲新興國家貨幣嚴重貶值，唔少分析師同投資者都呼籲土耳其加息，先可以穩定貨幣價格，避免資金流走。事實上，面對通脹情況，巴西央行已經係上個禮拜加息75個點，而俄羅斯亦係最近加息至4.5厘，並表示未來有機會繼續加息。

 

　　隨住美國進入零息後，全球央行都一齊放水撐起股市，不過睇嚟呢個「水浸」應該唔會持續太耐，因為全球金融市場都估計緊縮政策會提早開始。提醒返，美聯儲保證過2023年前唔加息㗎！

 

兩年炒三任行長，都係關息口事？

 

 （Shutterstock圖片)

 

　　埃爾多安任內已經炒三個行長，原來都係關息口事！係2019年7月，時任行長Murat Cetinkaya被解除職務，雖然無講明原因，不過當地媒體報道指埃爾多安因不滿減息太慢而產生矛盾；之後再由Murat Uysal接任，雖然都屈服埃爾多安嘅壓力，任內進行多次減息，但最後都係做16個月、係去年11月里拉跌至紀錄低位後就被炒。

 

　　土耳其行長三次被炒，呢個「三煞位」真係難做，所以大行高盛就預計，里拉呢一期走弱風險好大，預計土耳其央行將會進入「更超前的減息周期」(Front-loaded rate-cutting cycle)。唔知埃爾多安嘅減息政策會唔會救返起土耳其經濟呢？但可以肯定係，當疫情好返之後，去土耳其旅行的話，啲錢應該好使好多囉！

　　

撰文：李皆穎

　　

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票