《Online有話兒》蘋果庫克透露十年內或退休，自動駕駛技術成未來核心

　　據非正式統計，每五部電話入面，就有一部係蘋果出品，蘋果手機成為香港人生活中一部分，但又不經不覺地，原來庫克（Tim Cook）已經接手蘋果做CEO做足十年。最近庫克接受媒體訪問時表示，自己與蘋果十年合約原來係今年屆滿，究竟佢又會唔會同蘋果簽多十年合約呢？

 

（Shutterstock圖片)

 

庫克：十年內或退休

 

　　一樣嘢做足十年真係好犀利，自從庫克從Steve Jons接手蘋果後，蘋果手機未算有太大突破，反而周邊產品越開越多，最近公司更表示開展電動車業務，蘋果市值真係唔識點計！原來庫克今年8月同蘋果合約到期，早前佢接受《紐約時報》訪問時，被問到會唔會再做多十年，佢就好似唔多願意啦：

 

　　「再過十年？應該唔會啦，但我可以話你聽我而家感覺良好，卸任日子都仲未到，十年係一個漫長時間，可能唔會再做多個十年了。」

 

　　正所謂人生有幾多個十年，有時候都唔係錢嘅問題，而係想換下新環境、接受新挑戰呢！而且庫克1997年加入蘋果，大大話話係蘋果都做咗24年，有幾多人可以做到？

 

自動駕駛是未來核心技術，欣賞馬斯克的電動車

 

 

（Shutterstock圖片)

 

　　蘋果公司近期發表Apple Car相關新聞，令一眾蘋果迷十分期待，雖然仲未有原型車可以睇到，不過庫克就電動車自動駕駛方面透露小小風：

 

　　「我認為自動駕駛係未來核心技術，自駕車就好似一個機械人咁，通過自動化完成好多任務，大家可以留意住蘋果公司點樣發展，目前蘋果一個發展方向係為自駕車製造商搭做一個自駕技術平台。」

 

　　佢又大談特斯拉創辦人馬斯克，既欣賞佢所創立嘅公司，認為特斯拉已經做到難以置信嘅成就，又認為特斯拉可以保持行業領先地位咁長係好難得，唔知蘋果會唔會有一日可以同特斯拉睇齊呢？

 

AR技術同樣看重，今年或推出Apple Glass？

 

（Shutterstock圖片) 

 

　　隨著疫情爆發，人與人距離雖然隔開咗，但科技卻令人嘅關係更加緊密，庫克都認為，AR（擴增實境）技術改變人與人嘅溝通方式，佢預計AR技術可以係健康、教育、零售等領域發展。　　

 

　　其實市場有傳，蘋果將會推出一款名為「Apple Glass」嘅新產品，據了解會結合VR（虛擬實境）同AR技術，會係2021年蘋果重點產品之一，被問到係咪有呢件事，庫克就無直接回應啦！不過就表示AR將會係蘋果重要部分，咁等我哋拭目以待啦。

 

撰文：李皆穎

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好