早已預計新一屆立法會第一個會議係一地花生，但真係估唔到，整個宣誓以至主席選舉，會由建制、非建制及立法會秘書處，合演一場極度不堪嘅鬧劇。Tina絕無誇張，所有人都無演好自己嘅角色，令到香港上演咗一場悲劇。

　　悲劇有幾位男配角。第一男配角係梁耀忠。梁耀忠一早就知自己會去主持選舉主席會議，但佢在會議上嘅表現就有如一個新丁，完全Handle唔到成個會。承受唔到壓力之下，更加將主持位置讓出，事後更加要開記招道歉，爭在學唔到CY哽咽講句「我主持會議真係粒粒皆辛苦」。

　　成個非建制亦都係大配角。佢地一早就知道梁君彥選主席時係有國籍問題，如果早有部署的話，梁耀忠就唔會成為眾矢之的，被全港泛民支持者唾罵。非建制第二點失策，係石禮謙代替梁耀忠主持時，竟然無人質疑佢嘅合適性，因為石禮謙係有份和議梁君彥競逐主席，按會議常規根本就唔應該由佢去主持。

　　至於建制派，黃定光作為咁有「經驗」嘅議員，竟然被傳媒捉到佢講誓詞時竟然漏講「香港」兩個字，而立法會秘書長陳維安又聽唔到無指出錯處，令到成個建制派本來針對幾位「玩嘢」議員嘅論述都站唔住腳。

　　悲劇嘅女配角，係游蕙禎。我唔認識「尊貴的」游議員，亦唔知佢之前有無宣過誓，但睇佢年紀輕輕，應該都無咩機會去做。Tina咁大個女，都係宣過一次誓咁大把，就係喺婚禮上，在眾多親友見證之下，宣誓嫁畀我嘅Honey。結婚誓詞內容的確係千篇一律，但我好記得當日我一路講，眼淚一路咁流出嚟，心情久久未能平伏，因為我尊重我嘅誓言、尊重整個場合嘅莊嚴。

　　宣誓真係非常莊嚴嘅事，我想像唔到自己喺婚禮上面讀誓詞時加入粗口，甚至係辱罵我老公嘅字眼。如果我真係講得出口，我根本就唔會行入婚宴會場舉行婚禮。游小姐如果覺得跟住規定誓詞去講係好委屈你，當日就唔應該參選立法會。如果你真係有心要入立法會去表達你嘅政見、去伸張你認為嘅正義，首先亦都要先尊重好你自己嘅身份，你代表緊嘅唔單止係你自己，更加係整個香港嘅尊嚴。

　　Tina對政見唔同嘅人向來都好包容，但對於游小姐呢種唔單止有辱全球中國人，更令港人蒙羞嘅行徑，真係睇唔過眼。

　　未講呢套悲劇嘅主角，係整個香港。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇