梁頌恆、游蕙禎兩位新丁所引發嘅事件，可能係繼當年的23條之後，香港面臨最大嘅政治風波。不過今次想講下事件另一主角，大主席梁君彥。

　　先回帶去返CY透過律政司入稟緊急司法覆核之前。當日一有新聞話CY入稟，Tina第一個反應就係，梁游二人肯定無得上到去再宣誓，因為如果整個建制陣營真係「裏應外合」的話，最理想嘅做法，就係CY一早同梁君彥「打龍通」，講明法庭如果受理司法覆核後，梁君彥即時以「事件正在司法覆核」為由，押後兩梁游嘅宣誓，以減低事件嘅負面影響。雖然咁做隨時被相關人士反入稟質疑有關決定，但就起碼無咁樣衰。

　　點知到最後梁君彥繼續畀兩人宣誓，引發出建制流會抗梁游，單從成件事一路演變嘅劇情，Tina相信梁君彥同CY根本係零默契，所以有嘢都係出於「突發」。

點解無啦啦咁「突發」呢？

　　Tina聽聞，梁游兩位新丁嘅舉動今次真係驚動「天庭」，最「大大」粒嗰位知道來龍去脈之後動真火，立即頒下「聖旨」，唔畀梁游兩人喺議事堂用議員身份發表到一句說話。同天庭連線嘅西環知道龍顏大怒之後嚇到面青，CY亦都好快收到呢陣西北風。有人左度右度，就度咗一條棄車保帥嘅橋，入稟法院質疑梁君彥嘅裁決，既可以話畀阿爺知自己有做嘢，仲暗地裏同梁君彥劃清界線。由成件事發生至今，充分顯示梁君彥真係蒙在鼓裏，慘在佢上任主席之後連功都未領過一件就黑氣纏身，更要孭上呢隻世紀黑鑊，仲可能連經民聯嘅政治前景都被影響，大家睇下同為經民聯嘅梁美芬近周幾咁「賣力」反梁游，就知佢都要同梁君彥企開啲，為自己消消毒。

　　講返梁游事件，佢兩位玩出大頭佛搞到全城怒吼，民意可以話一面倒，如果如傳聞所言，搞到「大大」落柯打要見唔到佢兩位，我相信佢哋可以再宣誓嘅機會接近零，大家只係等待，究竟用咩方法去拉佢兩人落馬，特別係如果法院都判佢兩人無問題的話，成件事就更加複雜喇。

　　梁君彥今次處理手法極度低劣及不智，滿足唔到非建制，更加得罪埋建制派，最重要係喺北京方面失晒分。雖然在天庭眼中，成件事好多人都要負責，包括西環點解唔早早介入阻止，但無論如何，梁君彥肯定會食一隻最大嘅死貓。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情