梁游宣誓事件將會喺未來幾日進入戲肉。高等法院今日開始審理梁特嘅司法覆核入稟，另一方面，有傳阿爺要將安全網Set到有咁安全得咁安全，為確保將梁游禁絕於立法會，釋法事在必行。

　　Tina線人報料，話噚日中聯辦已經急急約見部分喺香港、對政壇有影響力嘅政協人物，同佢哋簡述阿爺釋法嘅意思，仲話會有「官員」來港向全港市民解釋今次釋法嘅決定。呢位「官員」，相信就係不少媒體已經披露過、2013年亦都來港解釋過政改並為政改定下重要框架嘅人大常委會副秘書長李飛。

　　線人仲話，今次釋法，雖然只係會針對《基本法》第104條，但李飛講話範圍會更闊，甚至可能會講明所有曾經表述過港獨或自決嘅人，都無資格去參選立法會，變相為選舉主任提供一條更清晰嘅界線，全面封殺所有港獨自決派日後嘅從政路。

　　出面有消息就話，阿爺可能會喺釋法嘅時候，解釋宣誓只可以有一次機會，咁樣就連劉小麗同姚松炎嘅資格都應該被褫奪。但係由於兩人已經成功再次宣誓，正式成為立法會議員，要拉佢兩個落馬有好大難度，再加上如果要對佢兩人郁手，事必會影響埋屬於建制陣營嘅進出口界黃定光；所以消息就話，阿爺目的只係針對仍然未宣誓嘅梁游。

　　據一位親政府人士講，阿爺其實唔多唔少都有「感激」梁游，因為佢哋當日宣誓極度愚蠢嘅行為，足以令整個社會輿論一面倒反梁游，就連泛民亦大多譴責梁游的舉動，令到阿爺可以攝到位，將透過釋法去解決當前嘅難題。真係要同梁游講返句：「多謝晒！」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票