綠在屯門｜森活樂章嘉年華

活動簡介

而家春暖花開係行山郊遊嘅好季節大家有冇去郊野公園欣賞大自然景色呢？原來香港有百分之四十嘅土地被劃定為郊野公園及特別地區，作為保護稀有及瀕危物種嘅生境藉此維持生物多樣性。

物種數量減少同我哋生活息息相關，每一次物種嘅消失，唔只係一種生命從地球上被永遠抹去，更係生態網絡上一道裂痕，影響整個生態系統，因此，維持生物多樣性係我哋人類共同嘅責任~

今個5月份「綠在屯門」以「國際生物多樣性日」作為主題，為大家準備咗一連兩日嘅 #森活樂章嘉年華，同大家分享生物多樣性嘅重要性，以及如何保護自然環境，體會人與大自然共生共癒嘅連結，攜手創造一個更宜居嘅環境。事不宜遲，等小編簡介一下當日有咩活動啦~

當日嘉年華活動十分豐富，分別有 #生態綠悠遊展覽，介紹香港嘅動植物資源同郊遊小貼士，仲有 #尋牛記 同 #免費二手市集，尋寶之餘一齊推動資源重用～仲有益智又好玩嘅攤位遊戲，考驗你對森林以及環保嘅認識，玩完仲有豐富獎品等緊你拎走！當然唔少得大人細路都超鍾意嘅 #升級再造 #環保工作坊，齊齊發揮小宇宙，動動手將廢物重新利用！

小編喺度提提你，而家參加嘉年華仲可以儲分換禮物㗎！只要於一場嘉年華中參與最少兩項活動；或於一場二手物收集活動中提交不少於2公斤二手物，並即場與當值職員完成登記，即可獲得1分「額外賞」積分，每階段累積滿2分「額外賞」積分，即可換領禮品。

玩得開心，又可以儲分換禮物，快啲Mark低以下日子，到時見喇！