「不如你都去啦⋯⋯」她誠意邀請。

　　節日前夕，她邀請我出席的不是聖誕party，而是speed dating，一齊找對象呀！

　　「校啱12月喎。」我揶揄她。

　　「拍拖都要應節嘛，哈！」她說：「嚟緊聖誕、新年，仲有情人節，冇理由自己一個嘅，你咪當陪我去囉。」

　　她拿著手機，看著不同的「約會菜單」，滿有心得的說：「有人話單對單好，speed dating公司幫你揀過，有質素保證嘛，但見得一個，唔啱咪浪費機會；Table for six輪住傾偈都好，但一晚先識得幾個，進度太慢啦，嘿。」

　　「多啲嚟，密啲手？」我忍不住笑她。

　　「而家要快啲識到人，去一大班人嘅活動，派多幾個電話嘛。」她認真程度比返工更甚。

　　「有咩推介先？」我純為八掛。

　　「呢個OK喎，BBQ party、聖誕酒會，話會有八十至一百個會員去喎，一場至少識番十個、八個啦。」她把手機遞向我，落力邀請。

　　感情事還未有著落會不安，來，快把握節日前脫單的黃金機會，計劃行事向目標進發。如果圈子細，就直接了當參加約會，走多幾場便多個機會，你又單身他又單身，大家方向一致，為求脫dry記得降低要求，有人陪至上啊。

　　聽說臨近節日，孤單症特別容易爆發，猶以單身日久的人士更見緊張、焦慮、抑鬱。誰想孤單一人，望著耀眼燈飾、滿街情侣、節日二人套餐、除夕倒數，假期怎麼消磨？她平時會間中參加speed dating，對象沒認識到，近日更是著急，target是年尾前找到男友，別落單呀。

　　愈投入極速約會，愈想找個人快速一起，好壞不要緊、了解不用多，最重要時間剛剛好，趁著節日氣氛順理成章一起？！當你急切找個人陪，他也一樣嗎？過完節後便是目標完成麼，真的有降低孤單感？