上個月，同大家講過《三隻小豬》嘅故仔，當時佢哋嘅下場，係俾狼用推土機推冧辛苦經營嘅石屎物業。原來，豬仔係有好多種下場㗎，但個下場無論係點，都係狼獲得最後勝利。呢幾日，又有幾隻小豬，俾狼哥哥嚇到一棟都冇，就嚟將自己啲基業拱手相讓。

　　根據極權威消息人士透露，有一群小豬又起咗間石屎屋，大大個牌匾寫住「法治」，其實個牌匾之前已經受到各種形式嘅摧殘，例如選擇性上色、指木為鐵，明明係木板，話係鐵板，然後狂打落去，仲有風吹雨打樣樣齊，但好在呢塊板係英國製，如果用中國領土上面香港特區啲沉香木嚟做？一係爆炸，一係一早俾啲同胞偷咗。

　　狼哥哥俾塊木板邪住，入唔到間屋，於是，狼哥哥想方設法，希望可以引到啲小豬出嚟，佢再乘虛而入大肆破壞搶嘢食。首先，佢燒起一場毒火，然後大嗌「火燭呀！」但屋內啲豬仔深知呢啲火唔會大得去邊，最多都係有人吹大佢，吹得耐會攰，攰就會熄火。狼哥哥不得要領，諗咗一諗，決定使出殺手鐧，佢先將啲毒火灰燼抹落去塊「法治牌匾」上面，然後，佢大嗌「人大要嚟釋法啦！」諗住嚇啲豬仔，等佢哋撲出嚟自己抹走啲毒灰燼，屋內嘅豬仔本來都唔信，但突然用望遠鏡見到北方有個巨人身影，額頭就鑿住「人大」兩個字，跑得超快，佢哋出得門口嚟，巨人都已經到，唔好講話法治牌匾，成間屋都俾佢踩冧咗。

　　 原來狼嗰個呼喚係咁有效，一嗌就應機。豬仔見到成間屋直接冇咗，啞口無言，剩返一殼眼淚。狼呢？佢自己都嚇到呆咗，但佢心入面點諗呢？就不得而知啦。

　　點解香港個故事，咁啱用嚟擺落三隻小豬個故仔度嘅呢？真係因為港豬特別多？唔係。豬度度都有，你估英豬美豬會少過港豬？但人哋同香港唔同嘅係，喺好耐以前有人不甘做一隻豬，喺當地建立咗一套制度，可以解決豬同豬之間嘅紛爭，最緊要，係建立一套有法可依，有說明書列好晒嘅程序，真係有人唔跟，都可以追溯返。英國喺臨離開香港前，教咗呢套英式程序同制度俾港人，但始終都留咗一手，因為英國人知道呢一個地方畢竟唔再屬於佢哋。而基本法就變成一個「畸胎」，有完整嘅身體部分，但係喺內裏有隨時可以廢武功嘅癌細胞，侍機爆發。

　　今時今日喺法庭拗緊嘅係咩？咪就係國家意志，同成文法律之間嘅對立。根據嗰啲唔開名都大概知邊個嘅消息人士講，中國政府係唔想有一絲嘅差池，驚法院太過專業，判咗一個佢哋唔想見到嘅結果，所以先會不惜用人大釋法，自行撕破假面具。港獨，喺呢刻嘅我同你都反對，但當件事已交上法庭處理，就唔到你班人大說三道四，基本法第158條點寫㗎？連689都冇叫你釋法，你釋法係咪違反基本法？

　　基本法之所以係「畸胎」，就係因為佢從來都係中共嘅工具，要麻醉香港人，等大家以為自己有一絲嘅自由，但到頭來，你講咗啲佢唔鍾意聽到嘅說話，佢可以用盡國家機器，去鬥死你，佢想點就點，用部法律去做配合。醉翁之意，根本就唔係剩係第104條。如果真係釋法，兩年前白皮書嘅對港嘅鷹派內容加埋入去「禁獨」，我唔會感到意外。你估剩係「港毒」被消滅？自決、自治都消滅埋。

　　呢刻，我諗起南韓嘅崔順實干政風波，無形之手操控朴槿惠，事件更牽扯到邪教，有人指出世越號船難可能係邪教嘅「祭祀儀式」，非常恐怖。

　　香港同中國之間嘅關係當然唔係咁唔見得光，但呢一星期顯示出嚟嘅，就係香港政府同朴槿惠一樣，只係扯線公仔，可能連講稿，一字一句都好似朴槿惠咁，係照辦讀出。有利一國，犧牲兩制，「五十年不變」，廿年未夠就收檔。

　　但南韓尚且可以有所謂「民主選舉」換走個政府，香港呢？仍然係喺度估北大人鍾意邊個，想踢走邊個，培養大家要試探主子心意。有真民主嚟到嘅時候，都好難有個人意願，因為呢一仗，國家意志大「鑊」，全勝。

　　眼利嘅讀者可能有個問題一直想問，點解上面個「極權威消息人士」，講嘢咁詳細嘅，似高層咁喎。嗱，睇慣香港新聞，尤其是近期有追開嘅你，乜仲唔知道，香港最「可靠」嘅消息來源，就係「消息人士」咩？