「德少，我好似出咗事……」實習仔P敲門求救。「出咗事」是個相當嚴重的指控，為免火上加油，令本身已經嚇到鼻哥窿無肉的P連鼻頭塊肉都無埋，我壓抑恐慌情緒，故作冷靜問︰「公事定私事？」

　　小弟當然明白，在公在私，出了事就是出了事。不過安撫動蕩神經的最佳方法，就是讓對方答問題。「公事。」很明顯恐懼已超出實習P的負荷，他沒法說出第3個字。

　　我意識到事態嚴重，連忙著P關房門，問︰「可唔可以話畀我知發生咩事？」

　　「大鑊啦大鑊啦，我唔想架，我真係無心架……」P吞吞吐吐。「你講嚟聽下先，一定拆得掂。」我打斷他無意義的發音，反正通常最能反映我們潛意識的，不是「唔想架」，就是「無心架」的衝口而出。

　　「我唔知邊度講起……」P六神無主。「長話短說啦。」P所謂的「長話短說」，一說就說了15分鐘，我不打算Recap，亦沒法Recap，總之長篇大論，重點只有一個——他在大圍面前直指老闆穿了鴛鴦襪，連隨無大無細加句︰「你同老婆嗌咗交？」直至老闆目露凶光，P才知死。

　　不懂方丈的脾性，得罪方丈是遲早的事，因為方丈都好小器。小弟綜合多年伴君如伴虎的經驗，歸納出以下7件絕對會得罪方丈的事︰

　　1、交唔到功課

　　2、令他出醜

　　3、鋒芒畢露

　　4、洩露離心

　　5、禍及家人

　　6、抽佢後腳

　　7、講未加修飾的真話

　　P出事位包括︰2、5、6、7，命中率達50%以上——還不特止！

　　「你知唔知你自己係點死架？」我沒好氣問。P叫得「實習」，自然入世未深，一雙可憐兮兮的眼睛望著我，像一對黑夜中行駛的車頭燈，相當刺眼。

　　「原來你最出事係呢個表情。」我望望P，繼續︰「呢度喺辦公室、係戰場，唔該你收起呢對無辜眼，出去醒醒目目做好你要做嘅事。」

　　P的莽撞不會直接讓他丟了份工，但卻會令他條路好難行。除了提醒他「睇路」兼做實事將功補過，我再沒有別的話說。

　　要Handle with care的，不是方丈，而是我們自己。