馬年一字記之曰奇--離奇、拍案驚奇。

　　羊年一字記之曰變--可能的變不可能、不可能的變可能。

　　馬年呢隻馬肯定係癲嘅!2013年底在專欄提過:

　　一.　「因立春八字偏埋一邊，所以會有許多極端的事情發生。」

　　這應了在香港佔領一事上，撐的與反的都咁熱情澎湃，親人反目、朋友unfriend，大纜扯唔埋!

　　二.　由於八字火旺，兼火乘木勢，「國際關係有火藥味，難免擦槍走火，甚則有armed conflict，烽煙起處，好可能是明年的五黃二黑位，即中國境內或境外的西北與正東……」本以為是中國之東的日本出事，卻原來是神州境外西北的烏克蘭著了火!

　　三.　還有奇事，就是MH370咁大架飛機，竟然唔見咗! 

　　好了。這瘋馬正奔向夕陽，接力的羊年會怎樣呢?

　　讓我們來研究一下乙未年羊年立春的八字:

　　這副八字的用神為木火，決定這用神的邏輯是這樣的:(如果你對八字的技術層面沒興趣，請直接跳到下一段)日元是辛金，坐下亥水洩氣，整副八字天干地支木重見火，火又剋金，金絕從木火。月支日支寅亥合木，未又是木庫，干透甲乙，破土缺金、午時歸火，木旺相從，故棄命從木火。

　　這段「火星文」，讓我用地球的江湖語言來演繹:就好似兩幫爭地盤，你係金幫，已經冇乜馬，貼身馬仔又唔生性，食塞米兼倒米，你冇人幫拖；木火幫則人多勢眾，不斷壯大，你根本無力還拖，惟有轉會，跟埋木火大佬搵食，即係If you can't beat them，join them!

　　要跟人搵食，係咪羊年唔好啫?

　　又唔一定喎!大體春夏佳，秋冬遜。

　　戊寅正月及己卯二月最好，其餘月份都蓋頭截腳，年尾十二月己丑，冬冷逢沖，是最要命的月份。

　　咁點算?

　　解救方法有:

　　一.　一年之計在於春，今次可能一年搵米在於春咧!

　　二.　著衫要揀紅綠，如許冠傑的歌詞「紅襯綠」咁就旺咧，嫌「娘」，分開著亦可，冬季要勁紅！

　　三.　可佩戴馬，馬為午火勁火，凡綠色、紅色、黃色玉石的馬都可以，最好貼身佩戴。

　　下期談羊年財運，stay tuned!